डडेल्धुरा । स्थानीय सरकार सञ्चालन ऐन, २०७४ को दफा ७१ बमोजिम व्ययको बजेट अनुमान आन्तरिक आयको परिधिभित्र रही औचित्यताको आधारमा विविध खर्च गर्नुपर्ने व्यवस्था छ । तर, डडेल्धुराका स्थानीय तहले औचित्यमा नरहेर मनपरी ढंगबाट खानामा खर्च गरेको पाइएको छ ।
महालेखापरीक्षकको ६१औँ वार्षिक प्रतिवेदनअनुसार गत आर्थिक वर्षमा जिल्लाका ५ वटा स्थानीय तहले ३७ लाख १९ हजार जति रकम खाना र विविधमा शिर्षममा खर्च गरेका छन् । जिल्लामा सबैभन्दा बढी नवदुर्गा गाउँपालिकाले खाना तथा विविधतर्फ मात्र ९ लाख ६३ हजार ८ सय १० खर्च गरेको पाइएको छ । नवदुर्गाले विविध खर्चमध्ये सभा सञ्चालन कार्यमा मात्र ९० हजार २१० खर्च गरेको छ ।
यस्तै परशुराम नगरपालिकाले खाना तथा विविधतर्फ ८ लाख ८४ हजार ७ सय २ खर्च गरेको छ । विविध खर्चमध्ये सभा सञ्चालन कार्यमा मात्र ३ लाख ७३ हजार ७५८ खर्च गरेको छ ।
यसैगरि गन्यापधुरा गाउँपालिकाले उक्त शिर्षकमा ८ लाख ५४ हजार ४ सय खर्च गरेको छ। उता अजयमेरु गाउँपालिकाले सोही शिर्षकमा ८ लाख ६७ हजार खर्च गरेको छ । उसले विविध खर्चमध्ये सभा सञ्चालन कार्यमा मात्र १ लाख ५० हजार खर्च गरेको छ ।
त्यस्तै भित्री मधेसमा रहेको आलिताल गाउँपालिकाले गत आवमा खाना तथा विविधतर्फ १ लाख ३५ हजार ४५२ खर्च गरेको छ । उसले विविध खर्चमध्ये सभा सञ्चालन कार्यमा मात्र १ लाख खर्च गरेको छ ।
