डडेल्धुरा । डडेल्धुरा सदरमुकाममा निर्माणाधीन रिङ्ग रोडको कल्भर्ट निर्माणमा कमसल सामग्री प्रयोग भएको पाइएको छ ।
बिहिवार राष्ट्रिय स्वतन्त्र पार्टी(रास्वपा)को टोलीले अनुगमन गर्दा अमरगढी- ५ को कीर्तिपुरदेखि वडा नम्बर ३ आइतबार बजार जोड्ने उक्त सडकको कल्भर्टमा बालुवा गिट्टी भन्दै माटोयुक्त निर्माण सामग्री प्रयोग गरेर पीसीसी ढलान गरिरहेको फेला परेको हो ।
साजेन्द्र निर्माण सेवाले बनाइरहेको उक्त कल्भर्ट निर्माणमा बदमासी भइरहेको पाइएपछि प्रमुख जिल्ला अधिकारी अन्जन न्यौपानेलाई निर्माणस्थलमा बोलाएको रास्वपाका जिल्ला सभापति सुरेन्द्र अवस्थीले बताए । प्रजिअलेसमेत निर्माण सामग्रीमा कैफियत पाएपछि केही नमुना लगेर गएको उनले जानकारी दिए ।
उनका अनुसार उक्त सडकखण्ड अन्तर्गत दुधिखोलामा निर्माण भइरहेको कल्भर्टमा कमसल काम भइरहेको थियो । 'हामीले पीसीसी भइसकेका अन्य कल्भर्ट पनि हेर्यौ, सबैतिर त्यसरी नै माटो मिसाएर काम भएको रहेछ' उनले भने ।
यता प्रजिअ न्यौपानेले पनि अनुगमन गर्दा कमसल सामग्री प्रयोग भएको पाइएको बताएका छन् । उनले सामग्रीको नमुना ल्याएर निर्माण कम्पनीलाई तत्काल काम रोक्न भनेको जानकारी दिए । 'भोलि नमुनाको गुणस्तर जाँच गर्न पूर्वाधार विकास कार्यालय पठाइनेछ, रिपोर्ट आएपछि मात्रै काम अगाडि बढाउन भनिनेछ, ' उनले भने ।
पूर्वाधार विकास कार्यालय डडेल्धुराको भ्याटसहित २३ करोडमा उक्त साढे ६ किलोमिटर सडक कालोपत्रे गर्न २०८० असारमा ठेक्का सम्झौता भएको थियो । २ वर्षमा काम सम्पन्न गर्ने गरि भएको ठेक्का सम्झतौको काम गत पुस महिनामा सुरुवात गरिएको थियो ।
यो रिङ्गरोड प्रदेशकै गौरवको आयोजना दैजी-पोखरा-ढुङ्गाड-बझाङ राजमार्ग अन्तर्गत पर्छ ।
