डडेल्धुरा । सडक बिस्तारका लागि मुआब्जा वितरण गरेको लामोसमयसम्म पनि धनधनीले संरचना नभत्काएपछि अन्तिमपटकका लागि ३५ दिनको समयअवधि दिइने निर्णय भएको छ । आइतबार प्रमुख जिल्ला अधिकारी चोमेन्द्र न्यौपानेको अध्यक्षतामा बसेको बैठकले संरचना भत्काउन अन्तिमपटक ३५ दिने सूचना प्रकाशित गर्ने निर्णय गरेको हो ।  

सदरमुकामको बागबजारदेखि उग्रतारा मन्दिरको मुल गेटसम्मका घर तथा जग्गाको सम्पूर्ण मुआब्जा वितरण भइसकेको छ । सडक डिभिजन कार्यालय डोटीका अनुसार मुआब्जा वितरण गरेर महाकाली राजमार्गको नाममा लालपूर्जा पनि आइसकेको छ ।

तर, मुआब्जाको सम्पूर्ण रकम पाएका घरधनीले पनि संरचना भत्काउन अटेरी गरेपछि अन्तिम पटकका लागि समय दिने निर्णय भएको प्रमुख जिल्ला अधिकारी न्यौपानेले बताए । 

यस्तै सोही बैठकले राजमार्ग छेउछाउ निर्माण भएका घर टहराको तत्काल विवरण संकलन गरी त्यस्ता घर टहरा हटाउन अमरगढी नगरपालिका, सडक डिभिजन र डिभिजन वन कार्यालयले आपसी समन्वय गरी अतिक्रमण खाली गर्न ३५ दिनको सूचना जारी गर्ने निर्णय पनि गरेको छ ।