डडेल्धुरा । पूर्वप्रधानमन्त्री एवं नेपाली कांग्रेसका सभापति शेरबहादुर देउवा विमानस्थलका लागि प्रस्तावित अजयमेरु गाउँपालिका– १ पुइलेक डाँडामा पुगेका छन् ।
गृहजिल्लामा रहेका देउवा बिहीबार विमानस्थल बनाइने भनिएको सो ठाउँको निरीक्षका लागि पुगेका हुन् । निरीक्षणपछि उनले हवाई मैदान निर्माणका लागि सम्भाव्यता सर्भे भएको र अब ‘डिटेल सर्भे, डिटेल डिजाइनिङ’ गरिने बताएका छन् । यी दुई वटै सर्भे भएपछि बजेट ल्याउने उनले बताए । उनले उक्त स्थान विमानस्थलका लागि उपयुक्त रहेको समेत बताएका छन् ।
२०७६ मा विमानस्थल निर्माणका लागि उक्त स्थान छनोट गरिएको थियो । नागरिक उड्डयन प्राधिकरणको टोलीले स्थलगत अध्ययनका अधारमा साविक समैजी गाविसको पुइलेकदेखि वयलडाँडासम्मको क्षेत्र उपयुक्त हुने बताएको थियो । त्यसपछि विमानस्थल निर्माणका लागि सर्वेक्षण भएको थियो ।
डोटी, दार्चुला, बैतडी, बझाङको केन्द्रविन्दु भएकै कारण डडेलधुरामा विमानस्थल सञ्चालनमा आए सुदूरपश्चिमको दुर्गमका बासिन्दाले यातायातमा राहत हुने विश्वास लिएका छन् ।
