काठमाडौं । कीर्तिपुरको टीयू क्रिकेट मैदानमा भरखरै सम्पन्न भएको एउटा रोमाञ्चक खेलमा सुदूर पश्चिम रोयल्सले ७३ रनको शानदार जीत हासिल गरेको छ । सुदूर पश्चिमले दिएको १६८ रनको लक्ष्य पछ्याउन मैदानमा प्रवेश गरेको काठमाडौं गुर्खाज ९४ रनमै समेटिएको हो ।
काठमाडौंका लागि स्टेफेन स्किनाजीले सर्वाधिक ३७ रनको योगदान दिए । उनीबाहेक सुमित महर्जनले १४ रन, गेहार्ड इरसमसले १० रन तथा भिम सार्कीले १० को योगदान दिए । उनीहरुबाहेक अन्य कुनै पनि खेलाडीले दोहोरो अंकले रन बनाउन सकेनन् ।
सुदूर पश्चिमका लागि नरेन साउदले सर्वाधिक ५ विकेट लिए । उनले ३.५ ओभर बलिङ गर्दै काठमाडौंका पा“च जना खेलाडीलाई पाखा लगाए । यसबाहेक ब्रान्डन म्याकुलम तथा साइफ जैबले समान एक तथा अभिनाष बोहोराले दुई विकेट लिए ।
यो संगै सुदूर पश्चिमले लगातार दुई खेल जितेर महत्वपूर्ण चार अंक बटुल्न सफल भएको छ । अर्कोतिर काठमाडौंले भने तीन खेलमध्ये दुईमा हार तथा एउटामात्र जीत हासिल गरेको छ ।
