डडेल्धुरा । डडेल्धुरामा सुदूरपश्चिम प्रदेश अन्तर पालिका स्तरीय महिला भलिबल प्रतियोगिता आयोजना हुने भएको छ । जिल्ला भलिबल संघको आयोजनामा यही पुस १४ गतेबाट आयोजना हुने प्रतियोगिता तीन दिनसम्म चल्ने आज पत्रकार सम्मलेनमार्फत् जानकारी दिइएको छ ।
उग्रतारा मावि पोखरोका खेल मैदानमा आयोजना हुने प्रतियोगिताको प्रथम पुरस्कार १ लाख १११ नगदसहित ट्रफी, मेडल र प्रमाणपत्र रहेको छ । त्यस्तै द्वितीय पुरस्कार ५० हजार १११ नगदसहित ट्रफी, मेडल र प्रमाणपत्र रहेको छ भने, तृतीय पुरस्कार २५ हजार १११ नगदसहित ट्रफी, मेडल र प्रमाणपत्र रहेको जिल्ला भलिबल संघका अध्यक्ष राजेन्द्र ठगुन्नाले बताए ।
प्रतियोगितामा उत्कृष्ट खेलाडीहरुलाई पनि विधागत नगद पुरस्कार दिइने उनले बताए । जसअन्तर्गत उत्कृष्ट खेलाडीलाई ५ हजार, उत्कृष्ट स्पाइकरलाई २५ सय, उत्कृष्ट सेटरलाई २५ सय, उत्कृष्ट डिफेन्डरलाई २५ सय, उत्कृष्ट सर्भर र राइजिङ खेलाडीलाई पनि २५ सय दिइने ठगुन्नाले बताए ।
प्रतियोगितामा सहभागी हुन कुनैपनि दर्ता शुल्क नलाग्ने आयोजकले जनाएको छ ।
