काठमाडौं । नेपाल प्रहरीको एकजना हवल्दारसहित १५ जना प्रहरी कर्मचारी २ महिनादेखि सम्पर्कविहीन भएका छन् । जसमध्ये डोटीको दिपायल सिलगढी नगरपालिका–९ घर भइ जिल्ला प्रहरी परिसर काठमाडौंमा कार्यरत प्रहरी नवान रुपक साउद पनि रहेका छन् ।

प्रहरी प्रधान कार्यालयले मंसिरदेखि सम्पर्कविहीन रहेका १५ जना प्रहरी कर्मचारीलाई सम्पर्कमा आउन अनुरोध गरेर बिहीबार सूचना जारी गरेको हो ।

उनीहरूको खोजतलास गर्दा गराउँदा तथा प्रहरी नियमावलीबमोजिम प्रक्रिया पूरा गरी सूचना टाँस भइसक्दा पनि सम्पर्कमा नआएको प्रहरी प्रधान कार्यालयले जनाएको छ।

आफू गैरहाजिर रहनुको कारण खोली सन्तोषजनक स्पष्टीकरण जवाफ सहित सात दिनभित्र उपस्थित नभए ती प्रहरी कर्मचारीहरूलाई प्रहरी नियमावलीको नियम १०९ को देहाय (ख) १ बमोजिम सेवाबाट हटाउने प्रहरी प्रधान कार्यालयको चेतावनी छ ।