धनगढी । कैलालीकाे धनगढीमा रहेकाे सेती प्रादेशिक अस्पतालमा सोमबार बिहान एक चिकित्सकमाथि आक्रमण भएको छ ।
बिहान करिब ४ बजे अस्पतालका डाक्टर बेदप्रकाश भट्टमाथि आक्रमण भएको हो । प्रहरीका अनुसार, धनगढी उपमहानगरपालिका–१३ निवासी रमतर रानाका २४ वर्षीय छोरा कृष्ण रानाले डाक्टर भट्टलाई कुटपिट गरेका हुन् । रमतर राना रक्तचापसम्बन्धी समस्याका कारण आइसीयूमा भर्ना भएका थिए, जसका कारण उनका छोरा अस्पतालमा कुरुवाका रूपमा बसेका थिए ।
घटनाबारे जानकारी दिँदै जिल्ला प्रहरी कार्यालयका प्रवक्ता डीएसपी कबिन्द्र सिंह बोहराले आक्रमणकारी कृष्ण रानालाई नियन्त्रणमा लिइसकिएको बताए। प्रारम्भिक अनुसन्धानका अनुसार, आईसीयूमा चेकजाँच सकेर फर्किने क्रममा रानाले डाक्टरमाथि आक्रमण गरेका थिए । हमलाका कारण डाक्टर भट्टको चस्मा फुटेको छ भने उनको मुखमा चोट लागेको छ ।
प्रहरीका अनुसार, आक्रमणकारी राना मानसिक रूपमा अस्वस्थ रहेको प्रारम्भिक अनुमान गरिएको छ । घटनाबारे थप अनुसन्धान भइरहेको प्रहरीले जनाएको छ ।
