डडेल्धुरा । ऐतिहासिक तथा सांस्कृतिक महत्व बोकेको अजयमेरु कोटमा ७५औं राष्ट्रिय प्रजातन्त्र दिवस विशेष समारोहका साथ मनाइएको छ। बुधबार जिल्ला समन्वय समितिको समन्वय र अजयमेरु गाउँपालिकाको आयोजनामा आयोजित कार्यक्रममा स्थानीय सरकारका प्रतिनिधि, प्रदेश सरकारका पदाधिकारी तथा नागरिकको उत्साहजनक सहभागिता रहेको थियो ।
"अजयमेरु कोटको संरक्षण हाम्रो पहिचान, श्रमको सम्मान र राष्ट्रको अभियान" भन्ने नाराका साथ दिवस मनाइँदा, उक्त कोटमा भइरहेको पुरातात्विक उत्खननबारे विशेष जानकारी गराइयो । गाउँपालिका अध्यक्ष उमेश प्रशाद भट्टका अनुसार पुरातत्व विभागको टोली २३ दिनदेखि उत्खनन कार्यमा संलग्न रहेको छ, जसका लागि गाउँपालिकाले ९० लाख रुपैयाँ विनियोजन गरी प्राविधिक सहयोग लिएको छ ।
कार्यक्रमका प्रमुख अतिथि सुदूरपश्चिम प्रदेशकी सामाजिक विकास राजमन्त्री सरस्वती खड्काले अजयमेरु कोटजस्ता ऐतिहासिक तथा पर्यटकीय स्थलको संरक्षण र प्रवर्द्धनमा सबै तहका सरकारको ध्यान जानु पर्ने बताइन् । उनले प्रदेश सरकार आवश्यक सहयोग गर्न तत्पर रहेको बताउँदै ऐतिहासिक सम्पदाको प्रचार-प्रसारमा सबै पक्षको सहकार्य अपरिहार्य रहेको उल्लेख गरिन् ।
पुरातत्व अधिकृत भास्कर ज्ञवालीका अनुसार उत्खनन कार्यलाई थप सात दिन लम्ब्याइएको छ । उनले पूर्ण दरबार पुनर्निर्माण गर्ने होइन, बरु भग्नावशेष संरचनाहरूको नम्बरीङ गर्ने काम भइरहेको जानकारी दिए । अजयमेरु कोटलाई विश्व सम्पदा सूचीमा समावेश गराउने प्रयासस्वरूप पुरातत्व विभागको अर्को टोलीले थप अध्ययन गर्ने जनाएको छ ।
कार्यक्रममा जिल्लाका सरकारी अधिकारी, राजनीतिक दलका नेता, स्थानीय प्रतिनिधि तथा सर्वसाधारणको उल्लेखनीय उपस्थिति थियो । अजयमेरु कोट संरक्षणको महत्व अझ बढ्दै गएको भन्दै स्थानीय तहले संघ र प्रदेश सरकारबाट थप बजेट तथा सहयोग आवश्यक रहेको माग गरेका छन् ।
