काठमाडौं । चर्चित हास्य कलाकार जोडी मदनकृष्ण श्रेष्ठ र हरिवंश आचार्य ‘मह’ले आफूहरूले कुनै पनि धर्मको विरोध नगरेको स्पष्ट पारेका छन्।

हाल सामाजिक सञ्जालमा उनीहरूमाथि यूएसएडको पैसा लिएर हिन्दु धर्मको विरोध गरेको आरोप लागिरहेका सन्दर्भमा बिहीबार बिहान भिडियो जारी गर्दै मह जोडीले ती आरोपहरू निराधार रहेको बताएका हुन्।

व्यंग्य धर्मविरोधी होइन

हरिवंश आचार्यले आफ्नो धारणा राख्दै भने, “व्यंग्य भनेको नेता, वकिल, डाक्टर तथा पण्डित सबैलाई गर्न पाइन्छ। हामीले कुनै पनि अवस्थामा सनातन हिन्दु धर्म, बुद्ध धर्म वा अन्य कुनै धर्मको विरोध गरेका छैनौँ। न त हामीले कसैलाई अर्को धर्म अपनाउन उक्साएका छौँ। यो केवल गलत प्रचार हो।”

उनले सन् ०५२ सालमा गरिएको ‘पञ्चायत व्यवस्थाको सराद्धे’ कार्यक्रममा एक पात्रमार्फत व्यंग्य गरिएको स्पष्ट पार्दै भने, “त्यो व्यंग्य विशेष पात्रको प्रवृत्तिप्रति लक्षित थियो, सम्पूर्ण धर्म वा वर्गप्रति होइन। म पनि पण्डितकै छोरा हुँ। व्यंग्य नेताहरूलाई गर्न पाइन्छ, पण्डितलाई गर्न पाइन्छ, डाक्टरलाई गर्न पाइन्छ। त्यसलाई धर्मको विरोध भनेर बुझ्नु गलत हो।”

अनर्गल प्रचारप्रति चित्त दुखाइ

मदनकृष्ण श्रेष्ठले पछिल्लो समय मह जोडीलाई यूएसएडको पैसा लिएर धर्मविरोधी गतिविधि गरिरहेको भन्ने गलत प्रचार फैलिएकोमा दुःख व्यक्त गरे। उनले भने, “हामी सबैलाई आफ्ना हितैषी सम्झिन्छौँ। आफ्ना हितैषीहरूबाटै यस्तो आरोप सुन्दा चित्त दुखेको छ।”

उनले मह जोडीले कुष्ठरोग, क्षयरोग, खोप जस्ता सामाजिक विषयमा जागरूकता फैलाउने काम गरेको बताउँदै थपे, “यी कुनै अधर्मका कुरा होइनन्। हाम्रो कुनै पनि टेलिफिल्म पूरा हेरेर जाँच्न सकिन्छ। हामीले कहिल्यै धर्मविरोधी कुरा बोलेका छैनौँ।”

धार्मिक आस्थाप्रति सम्मान

हरिवंश आचार्यले आफूहरू हाल चलचित्रको छायांकनमा व्यस्त रहेको उल्लेख गर्दै भने, “हामीले आफ्नो चलचित्रहरूको शुभारम्भ भगवानका मन्दिरहरूमा पूजा-आजाबाट गरेका थियौँ। हामी कहिल्यै पनि सनातन हिन्दु धर्म, बुद्ध धर्म वा कुनै पनि धर्मको विरोध गर्दैनौँ।”

साथै, उनले स्पष्ट रूपमा भने, “हामीले कुनै पनि धर्मको विरोध गरेका छैनौँ, न त अरूलाई धर्म परिवर्तन गर्न उक्साएका छौँ। यी सबै अनर्गल प्रचार मात्र हुन्। नेपाली जनतालाई भ्रामक कुराहरूको विश्वास नगरिदिन हार्दिक अनुरोध गर्दछौँ।”

मह जोडीले आफूहरू यस्ता आधारहीन आरोपहरूबाट हतोत्साहित नहुने बताउँदै आफूहरूको कलात्मक यात्रालाई निरन्तरता दिने प्रतिबद्धता जनाएका छन्।