Paschim Express
कञ्चनपुरबाट कोट किन्न गएका दिपराज बेपत्ता, ४ दिनपछि थियो बिहे

कञ्चनपुर । कञ्चनपुरमा एक रहस्यमय घटना सार्वजनिक भएको छ, जहाँ विवाहको तयारी लगभग पूरा भइसकेको अवस्थामा बेहुला अचानक बेपत्ता भएका छन् । लालझाडी गाउँपालिका-४, पर्सियाका दिपराज रानाको विवाह फागुन ४ गते शुक्लाफाँटा नगरपालिका-६, कसरौलकी सुमित्रा रानासँग तय भएको थियो । तर विवाहभन्दा चार दिनअघि नै बेहुला सम्पर्कविहीन भएपछि दुवै परिवारले विवाह स्थगित गर्न बाध्य भएका छन् ।

बेहुला दिपराज ३० माघमा विवाहको पोशाक(काेट) किन्ने भन्दै धनगढी बजार गएका थिए । तर त्यसपछि उनी फर्किएनन् । परिवारले निरन्तर सम्पर्क गर्ने प्रयास गरे पनि कुनै खबर नआएपछि परिवारमा त्रास र अनिश्चितता बढेको छ ।

बेहुलाका दाजु लोकराज रानाले भने, "भाइ विवाहको तयारीकै बीचमा हराए। पहिलो प्राथमिकता उनको खोजी हो, विवाहको कुरा दोस्रो हो ।"

परिवारले दिपराजको खोजीका लागि कञ्चनपुर र कैलाली प्रहरीमा निवेदन दिएका छन् । प्रहरीले खोजी कार्य जारी राखेको जनाएको छ, तर हालसम्म कुनै ठोस जानकारी सार्वजनिक भएको छैन ।

बेहुला बेपत्ता भएपछि विवाहका लागि गरिएका सम्पूर्ण तयारी खेर गएका छन् । दुवै परिवार शोकमा छन् । निमन्त्रणापत्र छपाइदेखि पाहुनाका लागि गरिएका तयारीहरू व्यर्थ बनेका छन् । स्थानीयहरू समेत यस घटनाले अचम्मित बनेका छन् ।

बैदेशिक रोजगारीबाट घर फर्किएका दिपराज धार्मिक परम्पराअनुसार विवाह बन्धनमा बाँधिन लागेका थिए । तर उनी अचानक हराएपछि गाउँमा विभिन्न अडकलबाजीहरू चल्न थालेका छन् ।

प्रकाशित मिति: शुक्रबार, फागुन ९, २०८१  ११:०१
प्रतिक्रिया दिनुहोस्
Weather Update