बाजुरा । बाजुराको बुढीगंगा नगरपालिका–३ की एक वृद्धा २५ वर्षपछि भारतको उत्तराखण्ड राज्यअन्तर्गत पिथौरागढमा फेला परेकी छिन्।
आफ्नो नाम शान्ति बताउने ती वृद्धा पिथौरागढस्थित वान स्टप सेन्टरको आश्रयस्थलमा रहेको केआईएन (किन) इन्डियाका प्रमुख नवीन जोशीले जानकारी दिएका छन् ।
लामो समय सडकमा बिताएकी उनलाई भारतीय प्रहरीले उद्धार गरी आश्रयस्थल पुर्याएको थियो । भारतीय प्रहरीले उनको परिवार पत्ता लगाउन विभिन्न संघसंस्था तथा क्षेत्रीय निकायलाई जानकारी गराए पनि पहिचान हुन सकेको थिएन ।
परिवारले लामो समयदेखि खोजी गरे पनि फेला पार्न नसकेपछि उनीहरू निराश भइसकेका थिए । जोशीका अनुसार, उद्धार गरेपछि केही समय उनी सडकमै बसेकी थिइन् भने पछि भारतीय प्रहरीले उनलाई आश्रयस्थलमा राखेको थियो ।
भारतीय प्रहरीले यस विषयमा धेरैपटक परामर्श गरेपछि सामाजिक सञ्जालमा तस्बिरसहितको जानकारी पोस्ट गरिएको थियो । सोही पोस्टका आधारमा उनको परिवार पत्ता लागेको जोशीले जानकारी दिए ।
‘हामी ५–७ दिनदेखि यसमा लागि परेका थियौं, आज फेसबुकमा पोस्ट गरेपछि परिवारसँग सम्पर्क भयो,’ जोशीले भने, ‘अब भोलि सिफारिस गरेर कानुनी प्रक्रिया अघि बढाइनेछ ।’
उनी सन् २००७ देखि वान स्टप सेन्टरको आश्रयस्थलमा बस्दै आएकी थिइन् । सामाजिक सञ्जालमा तस्बिर हेरेपछि उनकी छोरी वर्षा शाहले फोन गरेर उनी आफ्नी आमा भएको पुष्टि गरेकी थिइन् ।
बाजुराको बुढीगंगा नगरपालिका–३ निवासी उनका श्रीमान् चन्द्रबहादुर शाह र छोरा भूपेन्द्र शाहसमेत सम्पर्कमा आइसकेका छन् ।
भारतीय प्रहरीले ती वृद्धाको उमेर करिब ७० वर्ष रहेको अनुमान गरेको छ ।
