डडेल्धुरा । जिल्लाकाे परशुराम नगरपालिका–६ चन्दनीमा अवस्थित सिद्दनाथ माध्यमिक विद्यालयले आफ्नो ५०औं वार्षिकोत्सव तथा अभिभावक दिवस एवम् स्वर्ण महोत्सव कार्यक्रम यहि फागुन १८ गते भव्य रूपमा मनाउने भएको छ ।

स्वर्ण महोत्सवलाई भव्य बनाउन विद्यालयले विभिन्न कार्यक्रमहरू आयोजना गरेको विद्यालय व्यवस्थापन  अध्यक्षसमेत रहेका वडाअध्यक्ष त खगेन्द्र सिंहले जानकारी दिए  । यस अवसरमा प्रदेश स्तरीय पुरुष भलिबल प्रतियोगिता, माध्यमिक विद्यालय स्तरीय हाजिरीजवाफ प्रतियोगिता, राष्ट्रिय तथा स्थानीय कलाकारहरूको साङ्गीतिक प्रस्तुति, साथै शिक्षा क्षेत्रका विभिन्न व्यक्तित्व तथा संघ–संस्थाहरूको सम्मान कार्यक्रम पनि समावेश गरिएको छ । उनका अनुसार भलिबल प्रतियोगिताका लागि २ लाख रुपैयाँ राशिको पुरस्कार व्यवस्था गरिएको छ।

कार्यक्रमका प्रमुख अतिथि नेपाली कांग्रेसका केन्द्रीय सदस्य तथा सुदूरपश्चिम प्रदेश सभापति एवं पूर्व भौतिक पूर्वाधार विकास मन्त्री वीर बहादुर वलायर रहनेछन् । विशेष अतिथिका रूपमा सुदूरपश्चिम प्रदेश सरकारका सामाजिक विकास मन्त्री मेखराज खड्का, परशुराम नगरपालिकाका नगर प्रमुख भरत वडायर जोशी तथा अन्य विशिष्ट व्यक्तित्वहरूको उपस्थिति रहने बताइएकाे छ । 

विद्यालय व्यवस्थापन समितिले सम्पूर्ण शिक्षा प्रेमी, समाजसेवी, बुद्धिजीवी, राजनीतिकर्मी, जनप्रतिनिधि, सञ्चारकर्मी, शिक्षक, विद्यार्थी तथा अभिभावकलाई कार्यक्रममा उपस्थितिका लागि निमन्त्रणा गरेको छ ।