डडेल्धुरा । नेपाल पत्रकार महासंघ सुदूरपश्चिम प्रदेशका कोषाध्यक्ष बरुण पनेरुले डडेल्धुराका तीन वटा विद्यालयमा छात्रवृत्ति कोष स्थापना गरेका छन् । दुई दशकदेखि पत्रकारिता गर्दै आएका पत्रकार पनेरुले आफ्ना पूर्खाहरु एवं बुवाले अध्ययन तथा अध्यापन गरेका तीन वटा सामुदायीक विद्यालयमा छात्रवृत्ति कोष स्थापना गरेका हुन् ।
सामुदायीक विद्यालयमा अध्ययनरत निम्न वर्गका जेहेन्दार विद्यार्थीलाई पोशाक र शैक्षीक सामाग्री खरिद गर्नका लागि छात्रवृत्ति कोषको स्थापना गरेको पनेरुले बताए ।
आफूले आम्दानी गरेको रकमको १० प्रतिशत छुट्याएर विद्यालयमा कोषको स्थापना गरेको उनले बताए । हालसम्म उनले भागेश्वर गाउँपालिका– २ रुपालमा रहेको असिग्राम मावि र भागेश्वर गाउँपालिका– ३ बोगटाको सरस्वती नमूना माविमा २५–२५ हजार रुपैयाँको छात्रवृत्ति कोष स्थापना गरेका छन् ।
आफूले पढेको एवं बुवाले अध्यापन गरेको परशुराम नगरपालिका–६ चंदनीको शिद्धनाथ माविमा एक लाख रकमको छात्रवृत्ति कोष स्थापना गर्ने उनले बताए । शिद्धनाथ माविको आयतबार हुने स्वर्ण जयन्ती तथा अभिभावक दिवसका अवसरमा छात्रवृत्ति कोष स्थापना गर्न लागेको उनले बताए ।
उनले आफ्ना स्वर्गीय बुवा कृष्णप्रसाद पनेरुका नामबाट कृष्णप्रसाद अध्ययन छात्रवृत्ति कोष स्थापना गरेको बताए । उनका बुवा शिद्धनाथ माविको प्रधानाध्यापक रहेको समयमा २०५३ मंसिर ९ गते सडक दुर्घटनामा परि निधन भएको थियो । विद्यालयको कामका लागि जिल्ला सदरमुकाम डडेल्धुरा जाँदै गरेका उनका बुवाको भीमदत्त राजमार्गको गैरा बजार नजिक बस दुर्घना हुँदा निधन भएको थियो ।
पत्रकार पनेरुले २०६१ सालदेखि पत्रकारिता गर्दै आएक छन् । उनले तत्कालिन फारवेष्ट दैनिक नामक पत्रिकाबाट पत्रकारिता सुरु गरेका थिए । त्यसयता निरन्तर सक्रिय पत्रकारिता गरिरहेका पनेरु नेपाल टेलिभिजन, एभिन्यूज, नागरिक दैनिक हुँदै १० वर्षदेखि कान्तिपुर टेलीभिजनमा डडेल्धुराबाट पत्रकारिता गरिरहेका छन् । पत्रकारितासंगै सामाजिक कार्यमा पनि सक्रिय रहेका पनेरु डडेल्धुरा जेसिज वर्ष २०२० का अध्यक्षसमेत हुन् ।
