बैतडी । सामान्य लेनदेनको विवादले ठूलो रूप लिँदा बैतडीको दोगडाकेदार गाउँपालिका–८ का ३५ वर्षीय सुरेन्द्र विष्टले ज्यान गुमाउनु परेको छ। आफ्नै दाइ नाता पर्ने कर्णबहादुर विष्टसँग भएको ऋण विवादले शनिबार राति उनको हत्या भएको हो।

चार वर्षअघि ४० हजार रुपैयाँ सापटी दिएका सुरेन्द्रले पटक–पटक रकम फिर्ता माग्दै आएका थिए। तर, किसान पेशामा रहेका कर्णबहादुरले रकम फिर्ता नगरेपछि दुवैबीच बारम्बार विवाद हुँदै आएको थियो। गाउँका मानिसहरूले उनीहरूलाई पटक–पटक मिलापत्र गराउने प्रयास गरे पनि शनिबारको दिन त्यो विवाद ज्यानै लिने घटनामा परिणत भयो।

शनिबार राति सुरेन्द्र घर नजिकैको एक होटलमा खाना खाइरहेका बेला कर्णबहादुर त्यहाँ पुगे। रकमको विषयलाई लिएर दुवैबीच विवाद भएपछि होटलमा रहेका अन्य व्यक्तिहरूले कर्णबहादुरलाई घर पठाए। तर, केही बेरपछि उनी एक नाले बन्दुक लिएर पुनः होटलमा पुगे र पछाडिबाट गोली हाने। सुरेन्द्र गम्भीर घाइते भए र अस्पताल लैजाने क्रममा बाटोमै उनको मृत्यु भयो।

सुरेन्द्रकी श्रीमती, जो कक्षा १० मा अध्ययनरत छिन्, श्रीमानको असामयिक निधनले गहिरो शोकमा छिन्। मात्र सात महिना अघि प्रेम विवाह गरेका उनी अहिले अचेत अवस्थामा रहेको परिवारजनले बताएका छन्। सुरेन्द्रकी आमा माइत गएकी थिइन्, छोराको निधनपछि फर्किँदा उनले छोराको शव मात्र देख्न पाइन्।

प्रहरीका अनुसार कर्णबहादुरको नाममा यसअघि पनि वन मुद्दा थियो। उनले जङ्गली जनावर मृग मारेको आरोपमा मुद्दा खेप्नुपरेको थियो, तर आर्थिक चलखेलका कारण उनी जेल जानु परेन। अहिले फेरि हत्या गरेर फरार भएका उनी भारत जान सक्ने आशंका गर्दै प्रहरीले निगरानी बढाएको छ। घटनास्थलमा प्रहरी परिचालन गरिएको छ भने हत्यारा कर्णबहादुरको खोजी तीव्र पारिएको प्रहरी निरीक्षक बलदेव बडूले बताएका छन्।

सामान्य आर्थिक लेनदेनको विषयले यति ठूलो घटना निम्त्याउनु दुखद मात्र होइन, समाजमा कानुनी व्यवस्थाको कार्यान्वयन कति प्रभावकारी छ भन्ने विषयमा गम्भीर प्रश्न खडा भएको छ।