धनगढी । सुदूरपश्चिम प्रदेशमा नेकपा माओवादी केन्द्रभित्रको शक्ति संघर्ष गहिरिँदै गएकाे छ । पार्टी अध्यक्ष तथा पूर्व प्रधानमन्त्री पुष्पकमल दाहाल 'प्रचण्ड' को पटक–पटकको निर्देशन हुँदाहुँदै पनि खगराज भट्टलाई संसदीय दलको नेता बनाउन सकिएको छैन ।
पछिल्लो पटक प्रचण्डले कैलालीको टीकापुरमा आफू पुग्नुअघि नै खगराजलाई दल नेता बनाउने निर्देशन दिएका थिए । उनले गत बुधबार सुदूरपश्चिमका माओवादी सांसदलाई निजी निवासमा बोलाएर स्पष्ट रुपमा भनेका थिए, "म कैलाली आइरहेको छु, मेरो निर्देशन कार्यान्वयन हुनुपर्छ । धेरै दायाँबायाँ मलाई थाहा छैन ।"
तर, प्रचण्डको यो निर्देशन कार्यान्वयन हुन नसक्दा पार्टीभित्रको आन्तरिक विवाद झन् चर्किएको छ । संसदीय दलको बैठक समेत नबसी प्रचण्डको निर्देशन अवहेलना गरिँदा, नेतृत्व परिवर्तनको प्रक्रिया अन्योलमा परेको छ ।
सुदूरपश्चिम माओवादी संसदीय दलमा एक वर्षदेखि विवाद जारी छ । गत वर्ष माघ १२ मा खगराज भट्टलाई हटाएर मानबहादुर धामीलाई संसदीय दलको नेता बनाइएपछि विवाद झन् सतहमा आएको हो । हाल दल नेता धामीसहित सांसद अक्कलबहादुर रावल, ओमविक्रम भाट, लक्ष्मी विक र गीतादेवी मालले खगराजलाई नेता बनाउन अस्वीकार गरेका छन् ।
उनीहरूले पार्टीको प्रदेश इञ्चार्ज रहेका उपमहासचिव गिरिराजमणि पोख्रेललाई हटाएर आफ्ना समर्थकलाई इञ्चार्ज बनाउनु पर्ने माग अघि सारेका छन् । "पहिले प्रदेश इञ्चार्ज हेरफेर हुनुपर्छ, त्यसपछि मात्रै खगराजलाई नेता बनाउन सकिन्छ," उनीहरूको अडान छ ।
प्रचण्डको पकड कमजोर बन्दैछ ?
यस घटनाले माओवादी केन्द्रभित्रको गुटबन्दी र प्रचण्डको पकडबारे प्रश्न उठाएको छ । प्रदेशस्तरमा पार्टी नेतृत्वमाथि असहयोग देखिनु नेतृत्वमा असन्तुष्टि रहेको संकेत हो । प्रचण्डको निरन्तर दबाब हुँदाहुँदै पनि उनको निर्देशन कार्यान्वयन नहुनु, प्रदेश नेताहरू स्वतन्त्र निर्णय लिने अवस्थामा पुगेको देखिन्छ ।
अब प्रचण्डले यसलाई कसरी सम्बोधन गर्छन् भन्ने प्रश्न बाँकी छ । यदि उनले आफ्ना निर्देशनहरू कार्यान्वयन गराउन सकेनन् भने, सुदूरपश्चिम माओवादी केन्द्रभित्रको आन्तरिक शक्ति सन्तुलन झन् कमजोर हुन सक्ने आकलन गरिएको छ ।
