कैलाली । कैलाली र बर्दियाका झन्डै २ सय युवामाथि पानी जहाजमा जागिर दिलाउने प्रलोभनमा पारेर झन्डै चार करोड रुपैयाँ ठगी भएकाे छ । हिमांशु चौधरी र मनोज चौधरी नेतृत्वको गिरोहले युवाहरूलाई विभिन्न गाउँबाट सम्पर्कमा ल्याएर करोडौं रकम असुलेका हुन् ।
गिरोहले भारतको लखनउस्थित समुद्री ज्ञान मारिन एकाडेमीमा तालिम दिलाएर उनीहरूलाई दुई चरणको प्रशिक्षण दिएको थियो । पहिलो चरणमा १५ दिने सुरक्षा तालिम र दोस्रो चरणमा अङ्ग्रेजी भाषा प्रशिक्षण दिइएपछि युवाहरूलाई २० दिन भित्र जागिर दिने आश्वासन दिइएको थियो ।
तर, जब जागिरको ठेगानै नपाएर युवाहरूले गिरोहका मुख्य नाइके हिमांशु चौधरीलाई समाते, उनले उनीहरूलाई विभिन्न बैंकका चेक दिए । यी चेकहरू बाउन्स हुँदा ठगीको कुरामा युवाहरूलाई यथार्थको ज्ञान भयो ।
युवाहरूले जागिर पाउने आशामा स्वदेशका आफ्ना काम छोडेर ऋणसमेत उठाएर गिरोहलाई रकम बुझाएका थिए । अहिले न जागिर पाइयो, न लगानी फिर्ता, उल्टै ऋणको ब्याज तिर्न मुस्किल भइरहेको छ ।
पीडितहरूले प्रहरी र प्रशासनमा न्यायको गुहार मागे पनि उनीहरूको उजुरी दर्ता गर्न मानेन । अब उनीहरू श्रम विभाग र अन्य सम्बन्धित निकायहरूमा न्यायको खोजी गर्दैछन् ।
