बैतडी । बैतडीको दोगडाकेदार गाउँपालिका–८ कालागाउँमा भएको गोलीकाण्डपछि गाउँमा त्रास फैलिएको छ । २४ वर्षीय सुरेन्द्र बिष्टको हत्या भएको पाँच दिन बितिसक्दा पनि मुख्य अभियुक्त कर्णबहादुर बिष्ट अझै फरार छन् ।
लेनदेनको विवादले उग्ररूप लिएपछि ४५ वर्षीय कर्णबहादुर बिष्टले भरुवा बन्दुकबाट गोली हानेर सुरेन्द्रको हत्या गरेका थिए । घटनापछि उनी फरार छन्, र प्रहरीले अहिलेसम्म उनलाई पक्राउ गर्न सकेको छैन ।
गाउँमा त्रास, परिवार संकटमा
गाउँमा अझै डरको वातावरण छ। स्थानीय धनबहादुर बिष्टका अनुसार, "सामान्य विवादमै गोली चलाइयो । पाँच दिन भइसक्दा पनि हत्यारा पक्राउ नपर्दा गाउँलेहरू त्रसित छन् ।"
हत्या भएको पाँच दिन बितिसक्दा पनि अभियुक्त पक्राउ नहुँदा मृतकका आफन्त आक्रोशित छन्। सुरेन्द्रका दाजु नरेश बिष्ट भन्छन्, "हत्यारा खुलेआम घुमिरहेको आशंका छ। राजनीतिक पहुँचका कारण उसलाई जोगाउने प्रयास भइरहेको छ ।"
प्रहरीको खोजी तीव्र, परिणाम शून्य
जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूका अनुसार, अभियुक्तको खोजीमा प्रहरी परिचालन गरिएको छ, मोबाइल लोकेशन अध्ययन गर्दै अनुसन्धान भइरहेको छ । तर, पाँच दिनसम्म पनि प्रहरीले कुनै ठोस सफलता हात पार्न सकेको छैन ।
हत्या आरोपित कर्णबहादुर यसअघि पनि मृग चोरी शिकारीको आरोपबाट उम्किसकेका व्यक्ति हुन् । त्यसैले स्थानीयहरूलाई अब फेरि उनी राजनीतिक पहुँचकै कारण जोगिने हुन् कि भन्ने डर छ ।
सात महिना अघि मात्रै विवाह गरेका सुरेन्द्रकी श्रीमती शोकमा छन्, परिवार आर्थिक संकटमा परेको छ । गाउँलेहरू र पीडित परिवारले सुरेन्द्रका लागि न्यायको माग गरिरहेका छन् ।
