बैतडी । बैतडीको दोगडाकेदार गाउँपालिका-८ कालागाउँका ४५ वर्षीय कर्णबहादुर बिष्टलाई प्रहरीले भारतबाट पक्राउ गरेको छ । गत शनिबार गाउँकै २४ वर्षीय सुरेन्द्र बिष्टको गोली हानेर हत्या गरेपछि फरार भएका कर्णबहादुरलाई दार्चुलाको दत्तु पारी भारतीय क्षेत्रबाट आज पक्राउ गरिएको जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूले जानकारी दिए ।
सुरेन्द्रको हत्या गरेर फरार भएका कर्णबहादुरलाई पक्राउ गर्न सादा पोशाकमा प्रहरी टोली खटिएको थियो । कर्णबहादुरलाई भारतीय गाउँबाट पक्राउ गरिएको र थप विवरण आउन बाँकी रहेको बडूले बताए । अहिले उनलाई नेपालतर्फ ल्याउने प्रक्रिया जारी छ ।
कर्णबहादुर बिष्टले लेनदेनको विवादमा सुरेन्द्रलाई ४० हजार रुपैयाँ तिर्नुपर्ने विषयमा बिवाद गर्न लाग्दा भरुवा बन्दुकबाट गोली हानेर उनको हत्या गरेका थिए । हत्यापछि कर्णबहादुर बन्दुकसहित फरार भएका थिए, र उनको खोजीका लागि प्रहरी टोली सक्रिय थियो ।
सुरेन्द्रको हत्यापछि उनका परिवारको अवस्था अत्यन्तै दुखद भएको छ । सात महिना अघिमात्रै विवाह गरेका सुरेन्द्रको हत्याले उनकी श्रीमती र परिवारलाई गहिरो मानसिक तनावमा पुर्याएको मृतकका दाजु नरेश बिष्टले बताए ।
अब, अभियुक्त कर्णबहादुर बिष्टको गिरफ्तारी पछि अनुसन्धान प्रक्रिया अघि बढ्ने प्रहरीले जनाएको छ ।
