डडेल्धुरा । डडेल्धुरामा शैक्षिक गुणस्तर सुधारका लागि माध्यमिक तह सञ्चालित विद्यालयका प्रधानाध्यापकसंग अन्तरक्रिया कार्यक्रम भएको छ । सामाजिक विकास कार्यालय डडेल्धुराको आयोजनामा एकदिने अन्तरक्रिया कार्यक्रम भएको हो । 

कार्यक्रमका प्रमुख अतिथि जिल्ला समन्वय समितिका प्रमुख गगनसिंह भण्डारीले शैक्षिक गुणस्तर वृद्धिका लागि अन्तरक्रिया कार्यक्रम कोशे ढुङ्गा साबित हुने बताए । गुणस्तर सुधारका लागि सरकारी र गैरसरकारी संस्थाले काम गरिरहेको छ उनको भनाई थियो । डडेल्धुराका प्रमुख जिल्ला अधिकारी चोमेन्द्र न्यौपानेले भौतिक संरचना मात्र नभएर गुणस्तर शिक्षामा पनि ध्यान दिन प्रधानाध्यापकहरुलाई अनुरोध गरे । 

सामाजिक कार्यालयका कार्यालय प्रमुख राधाकृष्ण जोशीले शिक्षाको गुणस्तर खस्किनुमा शिक्षकको मात्रै दोष नभएको बताए । विभिन्न कारणले शिक्षाको अवस्था खस्केको बताउँदै उनले असल अभ्यासका बारेमा छलफल आवश्यक रहेको बताए ।