डडेल्धुरा । डडेल्धुराको शीर्ष साना किसान कृषि सहकारी संस्था लिमिटेडमा ११ लाख १३ हजार रुपैयाँ चोरी भएको घटनामा संलग्न पाँच जनालाई प्रहरीले पक्राउ गरेको छ । पक्राउ पर्नेमा सहकारीका अध्यक्ष बिरेन्द्र बिष्ट, प्रबन्धक हरिशप्रसाद भट्ट, सहायक प्रबन्धक सुमित्रा भट्ट लगायत अन्य सहकारीसँग आबद्ध व्यक्तिहरू पनि रहेका छन् ।
पक्राउ परेका व्यक्तिहरूलाई डडेल्धुरा जिल्ला प्रहरी कार्यालयमा ल्याइएको छ, जहाँ उनीहरूको विरुद्ध थप अनुसन्धान जारी रहेको प्रहरी निरीक्षक उपेन्द्र बमले जानकारी दिए । उनका अनुसार, हालसम्मको अनुसन्धानमा दोषीहरूलाई कडा कारबाही गर्ने प्रक्रिया अघि बढाइएको छ ।
गत चैत २३ मा परशुराम नगरपालिका–४, कटाल स्थित शीर्ष सहकारीको कार्यालयमा चाेरी भएको थियो । राति कार्यालय बन्द भएपछि कार्यालयको पछाडिको ढोका खोलेर नगद राखिएको लकर फुटाइ रकम चोरी भएको थियो ।
भोलिपल्ट बिहान मात्र यो चोरीको बारेमा थाहा पाइयो, र सीसीटीभी फुटेजको आधारमा अनुसन्धान जारी राखिएको थियो । यस संस्थामा १२ करोडसम्मको वार्षिक कारोबार भइरहेको थियो ।
प्रहरीले अब घटनामा संलग्न सबै व्यक्तिहरूलाई कानूनी कारबाहीको दायरामा ल्याउने प्रक्रिया तीव्र बनाएको छ।
