डडेल्धुरा । डडेल्धुराको परशुराम नगरपालिका- ५ परिगाउँमा कृषि ज्ञान केन्द्र डडेल्धुराको आर्थिक तथा प्राविधिक सहयोगमा चैते धानको खेती विस्तार गरिएको छ । त्यहाँ सञ्चालन भइरहेको लटिनाथ आईपीएम कृषक पाठशालाका सदस्य किसानहरूले हर्दिनाथ-१ र सुक्खा-५ जातको चैते धान रोप्न सुरु गरेका हुन् ।

किसानलाई प्रविधिक सहयोग
कृषि ज्ञान केन्द्र डडेल्धुराका सहायक बागवानी विकास अधिकृत तथा सूचना अधिकारी रामसिंह बोहरासहितको टोलीले किसानहरूलाई चैते धानको बीउ छनोट विधि, बेर्ना तयारी प्रक्रिया, र मलखाद व्यवस्थापनसम्बन्धी जानकारी प्रदान गरेको छ ।

कृषि ज्ञान केन्द्र डडेल्धुराका प्रमुख नरेन्द्र पनेरुका अनुसार कृषक पाठशालामा चैते धानको सम्पूर्ण प्रक्रिया – बेर्ना राख्ने देखि फसल भित्र्याउनेसम्मको छलफल हुने गर्छ ।

क्षेत्र विस्तार हुँदै
गत वर्ष चैते धानको सफल परीक्षण भएपछि यस वर्ष क्षेत्र विस्तार गर्ने उद्देश्यले परशुराम नगरपालिकाको ६० रोपनी जमिनमा चैते धान खेती सुरु गरिएको छ। वर्षमा दुई पटक धान उत्पादन गर्न सकिने भएकाले खाद्य सुरक्षामा टेवा पुग्ने र आयात प्रतिस्थापनमा पनि सहयोग पुग्ने कृषि ज्ञान केन्द्रका प्रमुख पनेरुले बताएका छन् ।

सहकारीको पनि योगदान
चैते धान प्रवर्द्धनका लागि परशुराम नगरपालिका- ४ कटालस्थित शीर्ष साना किसान सहकारी संस्था लिमिटेडले समेत सहयोग पुर्याइरहेको छ । सहकारीले किसानहरूलाई चैते धानको बीउ र मलखाद वितरण गरिरहेको छ ।

नेपालमा चैते धान रोपाइँ फागुन अन्तिमदेखि वैशाख दोस्रो हप्तासम्म गरिन्छ । डडेल्धुरामा यस वर्ष खेतीको क्षेत्र विस्तार भएसँगै किसानहरू उत्साहित देखिएका छन् ।