धनगढी । नेपाल विद्यार्थी संघ डडेल्धुराले विभिन्न खालका भ्रम सृजना गरी स्वतन्त्रपूर्वक अभिमत प्रकट गर्ने स्वतन्त्रतालाई कुण्ठित गर्ने प्रयास भइरहेको बताएको छ । त्रिविअन्तर्गत रहेका कलेजमा मंगलबार हुने स्ववियु निर्वाचनको मुखमा विभिन्न खालका भ्रम सृजना गर्ने कार्य भइरहेको नेविसंघ डडेल्धुराले जनाएको हो । 

नेविसंघ डडेल्धुराका अध्यक्ष पवन ऐरले विज्ञप्ति जारी गर्दै विभिन्न खालका भ्रम सृजना गरी स्वतन्त्रपूर्वक अभिमत प्रकट गर्ने स्वतन्त्रतालाई कुण्ठित गर्ने प्रयास भइरहेको भन्दै बताएका छन् । ‘यस्ता भ्रामक दुष्प्रचारको पछि नलागि स्वतन्त्रता, समानता, लोकतन्त्रका पक्षमा कटिवद्ध भई आफ्नो विवेक प्रयोग गरी स्वतन्त्र विद्यार्थी यूनियनको निर्वाचनलाई सभ्य, भव्य रुपमा सफल पार्न आम विद्यार्थी साथीहरुमा हार्दिक आह्वान गर्दछौं,’ उनले जारी गरेको विज्ञप्तिमा भनिएको छ ।

डडेल्धुरा जिल्ला सदरमुकाममा रहेको डडेल्धुरा बहुमुखी क्याम्पसमा पनि मंगलबार स्ववियु निर्वाचन भइरहेको छ । निर्वाचनको मुखमा माओवादीका नेताहरुले रेकर्ड गरेको एउटा अडियो भाइरल भइरहेको छ । उक्त अडियोमा काँग्रेसका नेताहरु स्ववियु निर्वाचनबारे चर्चा गरिरहेका छन् । अडियोमा विद्यार्थीलाई विभिन्न पक्षले पैसा दिएर प्रलोभन दिइरहेको विषयमा पनि चर्चा भएको सुनिन्छ । झण्डै नौ मिनेटको उक्त अडियो रहेकोमा ३४ सेकेन्डलाई मात्रै भाइरल बनाएर भ्रम सृजना गर्ने कार्य भइरहेको नेविसंघले जनाएको छ । 

उक्त अडियोमा कुनै सत्यता नभएको नेपाल विद्यार्थी संघ (नेविसंघ) बाट स्ववियु सभापतिका उम्मेदवार बनेका गौरव ऐरले दाबी गरेका छन् । । उनले चुनाव बिथोल्न प्रतिस्पर्धीहरुले अनेक हतकन्डा अपनाइरहेको आरोप लगाएका छन् । ‘त्यो अडियोमा मेरो मेरो कुनै संलग्नता छैन,’ उनले भने ।

डडेल्धुरा बहुमुखी क्याम्पसमा स्ववियुको नेतृत्वको लागि नेविसंघबाहेक अन्य दुई प्यानल पनि चुनावी मैदानमा छन् । अनेरास्ववियु र अखिल (क्रान्तिकारी) को साथ पाएर नेविसंघ (वीपी)का मदन बोहरा तथा स्वतन्त्रबाट कर्ण धामी प्यानलसहित चुनावी मैदानमा छन् । बोहरा र धामीले भने नेविसंघले विद्यार्थीलाई पैसामा खरिद गर्न खोजेको आरोप लगाएका छन् । 

मंगलबार हुने निर्वाचनमा ५ सय ५२ विद्यार्थीहरू मतदाता रहेको निर्वाचन समितिले जनाएको छ । संयुक्त प्यानलका तर्फबाट सभापतिका उम्मेदवार रहेका बोहरा २०७९ चैतमा भएको स्ववियु निर्वाचनमा पराजित भएका थिए । उक्त निर्वाचनमा नेविसंघको प्यानल नै विजयी भएको थियो । 

सभापतिमा नेविसंघका दुर्गा भट्ट तीन सय १० मतसहित विजयी हुँदा उनका प्रतिद्वन्द्वी बोहराले एक सय सात मत पाएका थिए ।