बाजुरा । बाजुरामा गाईलाई कुटपिट गर्दै नदीमा फाल्ने घटना सार्वजनिक भएपछि जिल्ला प्रशासन कार्यालयले दोषीहरूमाथि कारबाही अघि बढाएको छ । सामाजिक सञ्जालमा भाइरल भएको भिडियोमा स्थानीयले गाईलाई ढुंगाले हानेर कर्णाली नदीमा बगाउने प्रयास गरेको देखिएपछि प्रशासनले दोषीहरूलाई सदरमुकाम झिकाउन प्रहरीलाई निर्देशन दिएको छ ।
प्रमुख जिल्ला अधिकारी मेघानाथ पाध्याका अनुसार घटनामा संलग्नहरूमाथि अनुसन्धान गर्न प्रहरी परिचालित भइसकेको छ। ‘गाईलाई हिंसात्मक व्यवहार गर्नु कानुनी रूपमा दण्डनीय छ,’ उनले भने, ‘घटनामा संलग्नहरूसँग स्पष्टिकरण लिएर आवश्यक कानुनी कारबाही गरिनेछ। ’
गौदानको नाममा गाईमाथि हिंसा
स्थानीय वडाध्यक्ष धनबहादुर सार्कीका अनुसार मृतकको काजकिरियाको क्रममा गौदान गरिएको गाईलाई नदी पारि लखेट्ने परम्परा रहँदै आएको छ । तर, यसरी गाईलाई कुटपिट गर्दै नदीमा बगाउने कार्यले पशु अधिकार र कानुन दुवैको उल्लङ्घन भएको प्रशासनले जनाएको छ ।
भिडियोमा देखिएअनुसार गाईलाई बल प्रयोग गरी नदीमा बगाइएको थियो, तर फर्किन खोज्दा स्थानीयले ढुंगाले हान्दै पुनः नदीतर्फ धपाएका थिए । यद्यपि, प्रशासनका अनुसार गाई पुनः गाउँ फर्किएको छ र अहिले सुरक्षित अवस्थामा रहेको छ ।
कानुनी कारबाहीको माग
गाई राष्ट्रिय जनावर भएकाले यसप्रकारको हिंसा अस्वीकार्य रहेको भन्दै स्थानीय अधिकारकर्मीहरू दोषीलाई कारबाहीको माग गरिरहेका छन् । ‘संस्कृति र परम्पराको नाममा पशुमाथि हिंसा स्वीकार्य हुन सक्दैन,’ एक स्थानीय अभियन्ताले भने ।
यस घटनाले पशु अधिकारको विषयमा गम्भीर बहस उठाएको छ । प्रशासनले दोषीमाथि कानुनी कारबाही गर्ने प्रतिबद्धता जनाएको छ, जसले भविष्यमा यस्ता हिंसात्मक कार्य दोहोरिन नदिन मद्दत गर्ने अपेक्षा गरिएको छ ।
