धनगढी । सुदूरपश्चिम प्रदेश सरकारले ल्याउन लागेको 'प्रदेश स्थानीय सेवा गठन तथा सञ्चालन ऐन' तत्काल जारी गर्नुपर्ने माग गर्दै स्थानीय तहका कर्मचारीले मुख्यमन्त्री कार्यालय अगाडि धर्ना दिएका छन् ।
कर्मचारीहरूले सोमबारदेखि मुख्यमन्त्री तथा मन्त्रिपरिषद्को कार्यालयको मूल गेटमा धर्ना सुरु गरेका हुन् । यसका लागि स्थानीय तह कर्मचारी संघर्ष समिति गठन गरी संगठित आन्दोलन गरिरहेको छ ।
फागु पूर्णिमा (होली) को सार्वजनिक बिदाका कारण केही समय रोकिएको आन्दोलन सोमबारबाट पुनः सुरु भएको छ ।
उनीहरूको प्रमुख माग ‘सुदूरपश्चिम प्रदेश स्थानीय तहको गठन, सञ्चालन, र सेवाका सर्तसम्बन्धी व्यवस्था गर्न बनेको विधेयक–२०८१’ तत्काल जारी गरिनु पर्ने रहेको छ ।
यही विधेयक हाल प्रदेशसभाको विधायन तथा प्रदेश मामिला समितिमा विचाराधीन छ। त्यसमा आवश्यक संशोधनको माग गर्दै माओवादी र रास्वपा निकट विद्यार्थीहरू पनि आन्दोलनरत रहँदा स्थानीय तहका कर्मचारीहरू समेत आन्दोलनमा उत्रिएका छन् ।
