धनगढी । त्रिभुवन विश्वविद्यालयका आंगिक र मातहतका कलेजमा मंगलबार स्वतन्त्र विद्यार्थी युनियन (स्ववियु)को निर्वाचन हुँदै छ । डडेल्धुरा बहुमुखी क्याम्पसको चुनावी चर्चा पनि अहिले शीर्षमा छ । जहाँ स्ववियुको नेतृत्वको लागि त्रिपक्षीय प्रतिस्पर्धा भइरहेको छ । 

नेविसंघले गौरव ऐरलाई सभापतिको उम्मेदवार बनाएको छ । नेपाल विद्यार्थी संघ (बीपी) को नेतृत्वमा रहेको सयुक्त प्यानलबाट सभापतिमा मदन बोहरा उम्मेदवार छन् भने कर्ण धामीको नेतृत्वमा स्वतन्त्र प्यानल चुनावी मैदानमा छ । तीन वटै समूह चुनावी नतिजा आफ्नो पक्षमा पार्न अन्तिम कसरतमा छन् । 

यता नेविसंघ (वीपी)को तर्फबाट सभापतिको उम्मेदवार रहेका बोहरा भने चुनाव लड्नका लागि मात्रै डडेल्धुरा बहुमुखी क्याम्पसको विद्यार्थी बन्ने गरेको खुलेको छ । बोहरा २०७९ चैतमा भएको स्ववियु निर्वाचनमा पनि सयुक्त प्यानलकै तर्फबाट सभापतिका उम्मेदवार थिए । उक्त निर्वाचनमा नेविसंघको प्यानल नै विजयी हुँदा बोहरा पराजित भएका थिए । सभापतिमा नेविसंघका दुर्गा भट्ट तीन सय १० मतसहित विजयी हुँदा उनका प्रतिद्वन्द्वी बोहराले एक सय सात मत पाएका थिए ।  

०७९ सालमा पनि बोहरा स्ववियुको निर्वाचनको ठिक अगाडि स्नातक तह पहिलो वर्षमा भर्ना भएका थिए । यसपटक पनि उनले चुनाव लड्नकै लागि क्याम्पसमा भर्ना गरेको खुलेको छ । दुई वर्षअघि स्नातक प्रथम वर्षमा भर्ना भएका बोहरा यसपटक माघ ९ गते फेरि स्नातक तह प्रथम वर्षमा भर्ना भएका छन् । 

‘०७९ को निर्वाचनमा पराजित भएपछि बोहरा क्याम्पस फर्केका थिएनन्,’ डडेल्धुरा बहुमुखी क्याम्पसका एक विद्यार्थीले भने, ‘०७९ मा स्नातक प्रथम वर्षमा भर्ना भएको व्यक्ति ०८१ मा फेरि प्रथम वर्षमै भर्ना भएपछि चुनाव लड्नका लागि मात्रै विद्यार्थी बनेको त पुष्टि भइहाल्यो नि ।’

बोहराले पनि आफू ०७९ को स्ववियु निर्वाचन र अहिलेको निर्वाचनमा स्नातक तह पहिलो वर्षमै भर्ना भएको स्वीकार गरे । ‘अघिल्लोपटक भर्ना भएपछि परीक्षा फर्मको समयमा जिल्लाबाहिर हुँदा फर्म भर्न पाएन,’ उनले भने, ‘यसपटक फेरि भर्ना भएको छु ।’ स्ववियु सभापतिका अन्य दुई उम्मेदवार भने स्नातक तेस्रो वर्षका विद्यार्थी हुन् ।