डडेल्धुरा । सुदूरपश्चिम प्रदेशमा आजदेखि सुरु भएको माध्यमिक शिक्षा परीक्षा (एसईई)मा झण्डै ५९ हजार विद्यार्थी सहभागी भएका छन् । शिक्षा विकास निर्देशनालय दिपायलका अनुसार ३०,८७७ छात्रा र २८,०६६ छात्र परीक्षामा सहभागी भएका छन् ।
साधारण धारमा ४३,९२३, प्राविधिक धारमा २,०९२ तथा ग्रेड वृद्धि तर्फ १२,९२८ विद्यार्थी परीक्षा दिइरहेका छन् ।
प्रदेशभर २२६ परीक्षा केन्द्र तोकिएको छ। सबैभन्दा धेरै परीक्षार्थी रहेको कैलालीमा ५४ केन्द्रका १९,४८८ विद्यार्थी छन्। कञ्चनपुरमा ३७ केन्द्रका ११,३०१, बैतडीमा २७ केन्द्रका ५,३६२, अछाममा २६ केन्द्रका ५,०२९ विद्यार्थी छन् ।
त्यस्तै, बझाङमा २० केन्द्रका ४,६४४, डोटीमा १५ केन्द्रका ४,०६२, दार्चुलामा १७ केन्द्रका ३,०३७, बाजुरामा १७ केन्द्रका ३,०१८, र डडेल्धुरामा १३ केन्द्रका २,८०२ विद्यार्थी सहभागी भएका छन् ।
महानिर्देशक दुर्गादत्त विष्टका अनुसार परीक्षा निष्पक्ष, भयरहित र शान्त वातावरणमा सञ्चालन भइरहेको छ । परीक्षा बिहान ८ बजेदेखि सुरु भएको हो ।
