डडेल्धुरा । डडेल्धुरामा २९ जना स्थायी शिक्षक नियुक्त भएका छन् । शिक्षा सेवा आयोगको परीक्षाबाट उत्तीर्ण भएका शिक्षकहरूलाई शिक्षा विकास तथा समन्वय इकाईले बिहीबार नियुक्ति पत्र प्रदान गरी कार्यक्षेत्रमा खटाएको हो ।

इकाई प्रमुख खडक बहादुर महताका अनुसार, प्राथमिक तहको शिक्षक परीक्षामा सफल भएका उम्मेदवारहरूलाई नियुक्ति दिइएको छ । नियुक्त शिक्षकहरू स्नातक र स्नातकोत्तर तह उत्तीर्ण गरेका छन्, जसले शिक्षा क्षेत्रमा सुधार ल्याउने तथा गुणस्तर वृद्धिमा टेवा पुग्ने उनको विश्वास छ। शिक्षकहरूको भूमिका महत्त्वपूर्ण रहेको उल्लेख गर्दै, उहाँले विद्यालयहरूमा सकारात्मक र प्रोत्साहनयुक्त वातावरण सिर्जना गर्न आवश्यक रहेको बताए ।  साथै, नियुक्त शिक्षकहरूलाई आफ्नो जिम्मेवारी निष्ठाका साथ पूरा गर्न आग्रह गरे ।

कार्यक्रममा आलिताल गाउँपालिका–८ की नेहा भट्टराईले गुणस्तरीय शिक्षा प्रदान गर्ने प्रतिबद्धता व्यक्त गर्दै, नियुक्ति वितरण कार्यक्रमलाई शिक्षा क्षेत्रमा महत्त्वपूर्ण कदमका रूपमा व्याख्या गरिन् । अन्य शिक्षकहरूले पनि शिक्षा क्षेत्रको उन्नतिका लागि सक्रिय भूमिका खेल्ने प्रतिबद्धता जनाउँदै, जिल्लाका बालबालिकाको उज्ज्वल भविष्य निर्माणमा योगदान दिने बताए ।

पालिकाको आवश्यकताअनुसार शिक्षक दरबन्दी पठाइने र त्यसपछि पालिकाले उनीहरूलाई विद्यालयमा पुनः नियुक्त गर्ने व्यवस्था मिलाइने छ ।  कार्यक्रममा सामाजिक विकास कार्यालय डडेल्धुराका प्रमुख, नवदुर्गा गाउँपालिका–५ का वडा अध्यक्ष, शिक्षासम्बन्धी सरोकारवालाहरू तथा सञ्चारकर्मीहरूको उपस्थिति रहेको थियो । कार्यक्रमको सञ्चालन शिक्षा विकास तथा समन्वय इकाईका प्राविधिक सहायक गोपालदत्त पाण्डेयले गरेका थिए ।