डडेल्धुरा । डडेल्धुरा-डोटीको सीमास्थल शिखर नगरपालिका-१० स्थित गहनान तिर्थस्थल त्रिवेणी धाममा यहीँ चैत १७ देखि २५ गतेसम्म श्रीमद देवी भागवत महापुराण ज्ञान धन धन्याञ्चल लक्ष्य हवन महायज्ञ २०८१ आयोजना गरिने भएको छ ।
महायज्ञ मूल आयोजक समितिका अध्यक्ष ललित बलायरका अनुसार डोटी र डडेल्धुरा जिल्लाको संगमस्थल गहनान भूमिराज देवताको देवस्थलमा हुने यस महायज्ञले धार्मिक, पर्यटकिय, ऐतिहासिक तथा सामाजिक जनजीवनको प्रवर्द्धन गर्दै क्षेत्रको समग्र विकासमा टेवा पुर्याउने लक्ष्य राखिएको छ ।
पौराणिक महत्व बोकेको यस स्थललाई हिन्दू धर्मावलम्बीहरूको आस्थाको केन्द्र तथा तिर्थस्थलको रूपमा स्थापित गर्न महायज्ञ आयोजना गरिएको बताइएको छ । महायज्ञ उद्घाटन नेपाली कांग्रेसका सभापति एवं पूर्व प्रधानमन्त्री शेर बहादुर देउवाले गर्नेछन् भने प्रमुख वाचकका रूपमा आध्यात्मिक प्रवचनकर्ता पण्डित श्री ऋषिकेश उपाध्याय रहनेछन् ।
महायज्ञअन्तर्गत तुलादान, अन्नदान, गौदान, विशेष पूजा, ब्राह्मण भोजन, प्रसाद वितरण, व्रतबन्ध, योगविज्ञान शिविर, शालिग्राम पूजन, रुद्री पाठ, भजन-कीर्तन तथा बालसंस्कार कार्यक्रमहरू हुनेछन् । साथै, प्रमुख दाताहरूलाई सम्मानपत्र प्रदान गरिने र नाम शिलापत्रमा अंकित गरिने आयोजकले जनाएको छ ।
महायज्ञ सम्पन्न गर्न २० वटा उपसमिति गठन गरि कार्य विभाजन गरिएको छ । करिब एक करोड खर्च अनुमान गरिएको यस कार्यक्रममा दुई लाखभन्दा बढी भक्तजनहरूको सहभागिता रहने अपेक्षा गरिएको छ ।
डडेल्धुराको गन्यापधुरा, नवदुर्गा गाउँपालिका र डोटीको शिखर नगरपालिकाले प्रमुख संरक्षकको भूमिका निर्वाह गरिरहेका छन् । साथै, सुदूरपश्चिमका ८८ वटै पालिकाहरुलाई आवश्यक सहयोगका लागि आग्रह गरिएको अध्यक्ष बलायरले बताएका छन् ।
