डडेल्धुरा । डडेल्धुराको परशुराम नगरपालिका-१२ स्थित त्रिवेणी बहुमुखी क्याम्पस, जोगबुडाकी स्ववियु सभापति गौरा बोहराले आफ्नो कार्यकालको उपलब्धी सार्वजनिक गरेकी छन् ।

सुदूरपश्चिम विश्वविद्यालय अन्तर्गत रहेको त्रिवेणी बहुमुखी क्याम्पसमा २०७९ साल चैत ८ गते सम्पन्न स्ववियु निर्वाचनमा गौरा बोहरा नेपाली विद्यार्थी संघबाट सभापतिमा निर्वाचित भएकी थिइन् ।

उनले अनेरास्ववियु र अखिल क्रान्तिकारीका पुरुष उम्मेदवारलाई पराजित गर्दै जित हासिल गरेकी थिइन् । उनले नेपाली कांग्रेस, क्याम्पस प्रशासन, विद्यार्थी तथा सहयोगी निकायहरूलाई धन्यवाद व्यक्त गरेकी छन्।

उनले सार्वजनिक गरेका उपलब्धीहरू निम्नानुसार छन्:

१) विद्यार्थीको व्यक्तित्व विकासका लागि अतिरिक्त क्रियाकलापहरू (नवआगन्तुक विद्यार्थीहरूको स्वागत, अध्ययन पूरा गरेका विद्यार्थीहरूको बिदाइ, हाजिरीजवाफ प्रतियोगिता, वक्तृत्वकला प्रतियोगिता, कविता वाचन तथा निबन्ध लेखन) सञ्चालन

२) कला र संस्कृतिसम्बन्धी कार्यक्रमहरू (तीज विशेष कार्यक्रम, दशैं विशेष शुभकामना आदान-प्रदान, सरस्वती पूजा, होली उत्सव) सञ्चालन

३) शैक्षिक तथा औद्योगिक भ्रमणको आयोजना

४) छात्राहरूका लागि सेनेटरी प्याड वितरण तथा प्रयोग गरिएका सेनेटरी प्याड डिस्पोजल मेशिनको व्यवस्था।

५) ई-लाइब्रेरी स्थापनाका लागि पहल

६) आइसीटी ल्याबको व्यवस्थापन

७) शुद्ध खानेपानीको व्यवस्थापनका लागि पहल

८) क्याम्पसमा खेलकुद सामग्री तथा पंखाको व्यवस्था

९) क्याम्पस परिसरमा वृक्षारोपण

१०) छात्रा तथा छात्र छात्रावासमा वाइफाइको व्यवस्था

११) क्याम्पस परिसरको सरसफाइ तथा फोहोर व्यवस्थापनका लागि डस्टबिनको व्यवस्था

उनले यी सम्पूर्ण कार्यहरू टिमवर्क, पार्टीका विभिन्न तह, जिल्ला, प्रदेश, नगर तथा वडा तहका सहयोगबाट सम्भव भएको बताएकी छन्। उनले प्रदेश, संघ, र स्थानीय सरकारसमक्ष विभिन्न मागपत्रसमेत बुझाएको उल्लेख गर्दै विभिन्न कार्यक्रमका फोटोहरू पनि सार्वजनिक गरेकी छन्।

बोहरा नेतृत्वको कार्यकाल चैत २७ गते सम्पन्न हुँदैछ, जसपछि नयाँ नेतृत्व चयन हुनेछ । डडेल्धुरा बहुमुखी क्याम्पसमा नेविसंघका गौरव ऐरको नेतृत्वमा नयाँ समिति चयन भइसकेको छ । अनेरास्ववियु, अखिल क्रान्तिकारी, तथा नेपाली कांग्रेस (बीपी) को संयुक्त गठबन्धनलाई पराजित गर्दै नेविसंघले जित हासिल गरेको हाे ।

त्रिवेणी बहुमुखी क्याम्पस, जोगबुडामा आगामी स्ववियु निर्वाचनमा कुन संगठनले नेतृत्व लिनेछ भन्ने चासो बढिरहेको छ । विद्यार्थी संख्याको हिसाबले छात्रा बढी रहेको यो क्याम्पसमा लगातार दोस्रोपटक नेविसंघले जित हासिल गरेको थियाे ।