कैलाली । सुदूरपश्चिम प्रदेश अन्तर्गत महाकाली नदीमा र्‍याप्टिङ प्रवर्द्धन र दिगोपनका लागि संयुक्त कार्ययोजना तयार गरिएको छ । ३२ औँ विश्व पानी दिवसको अवसरमा धनगढीमा आयोजित कार्यशालामा ग्रामीण महिला विकास तथा एकता केन्द्र (रुडुक) द्वारा सञ्चालित ट्रोसा परियोजनाको पहलमा उक्त कार्ययोजना निर्माण गरिएको हो ।

कार्यशालामा भिमदत्त नगरपालिका, परशुराम नगरपालिका, भागेश्वर गाउँपालिका तथा महाकाली नगरपालिकाका प्रतिनिधिहरू, निजी क्षेत्र, होटल तथा पर्यटन व्यवसायी, साथै रुडुक र अक्सफाम नेपालका प्रतिनिधिहरूको उपस्थिति रहेको थियो। सहभागीहरूले आर्थिक वर्ष २०८२/८३ का लागि र्‍याप्टिङ प्रवद्र्धन तथा दिगोपनका लागि संयुक्त कार्ययोजना तयार गरेका छन् । कार्यशालामा तीनै तहका सरकारको समावेशीकरण, उनीहरूको भूमिका, जिम्मेवारी तथा कार्यान्वयनको समयरेखा स्पष्ट रूपमा परिभाषित गरिएको छ। साथै, महाकाली नदीमा र्‍याप्टिङका अवसर र चुनौतीहरूबारे व्यापक छलफल गरिएको छ ।

कार्ययोजनामा प्रदेशस्तरीय जलयात्रा नीति तथा नियमावली निर्माण, स्थानीय तहमा जलयात्रा कार्यविधि निर्माण, दार्चुलादेखि कञ्चनपुरसम्म छोटो र लामो दूरीका जलयात्रा प्याकेजहरू निर्माण, तथा जलयात्रा क्षेत्रमा यातायात व्यवस्थापनलाई सहज बनाउने योजनाहरू समेटिएका छन् ।

कार्यक्रममा सुदूरपश्चिम प्रदेश सरकारका अर्थमन्त्री बहादुरसिंह थापा, सामाजिक विकास मन्त्री मेघराज खड्का, सामाजिक विकास राज्यमन्त्री सरस्वती खड्का तथा पूर्व आन्तरिक मामिला मन्त्री डा. राणबहादुर रावलको उपस्थिति रहेको थियो ।

कार्यशालामा सहभागी तीन जिल्लाका प्रतिनिधिहरूले महाकाली नदीमा व्यावसायिक र्‍याप्टिङ प्रवद्र्धनका लागि भइरहेको पहल, दृष्टिकोण र योजनाहरू प्रस्तुत गरे। छलफलमा नदी किनाराका समुदायहरूको जीविकोपार्जनमा र्‍याप्टिङले पुर्याउन सक्ने योगदानलाई विशेष प्राथमिकता दिइयो ।

अर्थमन्त्री थापाले महाकाली नदीमा व्यावसायिक र्‍याप्टिङ प्रवद्र्धन गर्न प्रदेश सरकारको पूर्ण सहयोग रहने प्रतिबद्धता जनाए । साथै, उनले अभियानलाई अघि बढाउन स्थानीय सरकार, निजी क्षेत्र तथा कार्यान्वयन साझेदारहरूको सहकार्यलाई उच्च प्रशंसा गरे।