डडेल्धुरा । डडेल्धुरामा यस आर्थिक वर्षको साउनदेखि माघसम्म ७१ जना नयाँ क्षयरोगका बिरामी फेला परेका छन् । तीमध्ये ६५ वर्षभन्दा माथिका २९ जना र १५ देखि २४ वर्ष उमेर समूहका २९ जना रहेका छन् ।
स्वास्थ्य कार्यालय डडेल्धुराका अनुसार, गत आर्थिक वर्षमा ३१५ जनाको जाँच गर्ने लक्ष्य रहे पनि १४६ जनामात्र परीक्षण गरिएको थियो । हालसम्म डडेल्धुराका विभिन्न स्थानीय तहमा निम्न संख्यामा क्षयरोगका बिरामी फेला परेका छन् –
- अमरगढी: ३२
- गन्यापधुरा: १५
- भागेश्वर: १२
- नवदुर्गा: २०
- आलिताल: १८
- परशुराम: १५
- अजयमेरु: १२
यसैबीच, "हामी क्षयरोग अन्त्य गर्न सक्छौँ । लगानीको प्रतिबद्धता र सेवा प्रवाहको सुनिश्चितता आजको आवश्यकता हो” भन्ने नाराका साथ डडेल्धुरामा विश्व क्षयरोग दिवस २०२५ को अवसरमा पत्रकारहरूसँग अन्तरक्रिया कार्यक्रम सम्पन्न भएको छ ।
कार्यक्रममा प्रमुख जिल्ला अधिकारी चोमेन्द्र न्यौपानेले नेपाल सरकारले क्षयरोग नियन्त्रणका लागि विभिन्न कार्यक्रम सञ्चालन गर्दै आए पनि लक्ष्य हासिल गर्न अझै ठूलो प्रयास आवश्यक रहेको बताए । जिल्ला समन्वय समिति डडेल्धुराका प्रमुख गगनसिंह भण्डारीले सहकार्य नै सफलता प्राप्त गर्ने मुख्य आधार भएको भन्दै सबै निकायले हातेमालो गर्नुपर्ने आवश्यकता औंल्याए ।
स्वास्थ्य कार्यालयका सरुवा रोग नियन्त्रण फोकल व्यक्ति हरिप्रसाद भट्टका अनुसार, नेपालमा हरेक वर्ष ७० हजार नयाँ क्षयरोगी देखा पर्ने गरे पनि केवल ३० हजार बिरामी मात्र पहिचान हुने गरेका छन् । क्षयरोग सजिलै सर्ने हुँदा एक संक्रमित व्यक्तिले १० देखि १५ जनासम्मलाई रोग सार्न सक्ने उनले बताए ।
गत वर्ष ८८ जना बिरामी उपचारपछि निको भए पनि ६ जनाको मृत्यु भएको थियो । यस वर्ष हालसम्म १ जनाको मृत्यु भइसकेको छ ।
कार्यक्रममा सहभागी पत्रकारहरूले क्षयरोगबारे जनचेतना फैलाउन मिडियाको भूमिका अझ प्रभावकारी बनाउनुपर्ने धारणा राखेका थिए ।
