अछाम । अछामको मंगलसैन नगरपालिका–५ स्थित खाध्या मोड नजिकै मध्य पहाडी लोकमार्गमा मोटरसाइकल दुर्घटना हुँदा एक जनाको मृत्यु भएको छ भने अर्को घाइते भएका छन् । 

ठुलासेनबाट मंगलसैन जाँदै गरेको से ७ प १४६९ नम्बरको मोटरसाइकल अनियन्त्रित भई सडकबाट करिब ३५ मिटर तल खसेर दुर्घटनाग्रस्त भएको हो । दुर्घटनामा मंगलसैन नगरपालिका–१ कुन्ति बस्ने २० वर्षीय जीवन थापाको मृत्यु भएको छ । उनलाई घाइते अवस्थामा उपचारका लागि जिल्ला अस्पताल मंगलसैन लगिएको थियो, जहाँ उपचारका क्रममा उनको मृत्यु भएको जिल्ला प्रहरी कार्यालय अछामले जनाएको छ ।

मोटरसाइकलमा पछाडि सवार सोही ठाउँका १७ वर्षीय चेतन थापा घाइते भएका छन् । उनको हाल बयलपाटास्थित न्याय हेल्थ अस्पतालमा उपचार भइरहेको प्रहरीले जानकारी दिएको छ ।