डडेल्धुरा । जिल्लाकाे परशुराम नगरपालिका–४ कटालस्थित शिर्ष साना किसान कृषि सहकारी संस्थामा एक वर्षअघि भएको चोरी प्रकरण कानूनी कारबाहीतर्फ अगाडि बढ्न नपाउँदै मेलमिलापतर्फ मोडिएको छ ।
गत वर्ष २०८० चैत्र २५ गते सहकारीको कार्यालयबाट ११ लाख १३ हजार चार सय ९६ रुपैयाँ नगद र सीसीटीभी डिभाइससहितका सरसामान चोरी भएको थियो । चोरी प्रकरणमा संलग्नताको आशंकामा डडेल्धुरा प्रहरीले सहकारीका अध्यक्ष बिरेन्द्र विष्ट, प्रबन्धक हरिशप्रसाद भट्ट, सहप्रबन्धक सुमित्रा शर्मा भट्ट, कार्यालय सहयोगी महेश सार्की र मदनसिँह धामीलाई प्रक्राउ गरी न्यायीक हिरासतमा राखेर अनुसन्धान अघि बढाएको थियो ।
अनुसन्धानका क्रममा संस्थाका कर्मचारी र सञ्चालककै संलग्नता हुनसक्ने आधार देखिएपछि पक्राउ परेकाहरूमाथि मुद्दा दर्ता गर्ने तयारी गरिँदै थियो । तर, प्रहरी अनुसन्धान पूरा भइसकेर मुद्दा दर्ताको प्रक्रिया अघि बढाउन खोज्दा सरकारी वकिल कार्यालयको मौखिक सिफारिसमा मेलमिलापतर्फ मोडिएको हो।
डडेल्धुरा प्रहरी प्रमुख डीएसपी सुगन्ध श्रेष्ठका अनुसार अभियुक्तहरूले कसुर कबुल गरिसकेका थिए र आवश्यक प्रमाणहरू समेत जुटिसकेका थिए । तर, कानूनी प्रावधानअनुसार सहकारी ठगी तथा बैंकिङ कसुर मुद्दामा पीडित पक्षले क्षतिपूर्ति पाउने गरी मेलमिलाप गर्ने विकल्प खुला रहेको हुँदा घटनालाई सोही दिशामा लैजान सुझाव दिइएको हो ।
सरकारी वकिल कार्यालय डडेल्धुराका सूचना अधिकारी हरिहर भट्टका अनुसार यदि अभियुक्तहरूले चोरी भएको रकम दाखिला गरेको बैंक भौचर प्रमाणको रूपमा प्रस्तुत गरेमा कानूनी रूपमा मुद्दा टुङ्ग्याउन सकिन्छ । स्थानीयस्तरमा गठन भएको संघर्ष समितिका संयोजक एवं वडा अध्यक्ष विश्रामसिंह बोहराले पीडित बचतकर्ताहरूको रकम फिर्ता हुने सुनिश्चित भए मात्र मेलमिलाप स्वीकार्य हुने धारणा राखेका छन् ।
चोरी भएको रकम फिर्ता भएपछि मात्र मेलमिलाप स्वीकार गरिनुपर्ने स्थानीयको माग छ । यो घटनाले डडेल्धुरामा सहकारी प्रणालीमा देखिएको जोखिम र प्रहरी अनुसन्धानको क्षमतामाथि प्रश्न उठाइदिएको छ ।
