डडेल्धुरा । डडेल्धुरामा तीन दिने आकस्मिक स्वास्थ्य सेवाको स्तरीय उपचार पद्धतिको अभिमुखीकरण कार्यक्रम सुरु भएको छ । सुदूरपश्चिमको सामाजिक विकास मन्त्रालयअन्तर्गत रहेको स्वास्थ्य निर्देशनालय दीपायलले आयोजना गरेको कार्यक्रमको सामाजिक विकास राज्यमन्त्री सरस्वती खड्काले उद्घाटन गरिन् ।
कार्यक्रममा बोल्दै प्रमुख अतिथि खड्काले स्वास्थ्य क्षेत्रमा कुनै पनि कसर बाँकी नराखी काम गर्न स्वास्थ्यकर्मीलाई आग्रह गरिन् । नेपाल सरकारले निशुल्क उपलब्ध गराउने औषधिसमेत स्वास्थ्य चौकी तथा अस्पतालमा नहुने गरेको बताउँदै उनले त्यसको व्यवस्थापन गर्न जरूरी रहेको बताइन् ।
स्वास्थ्य निर्देशक खगेन्द्र बमले आधारभुत स्वास्थ्य सेवा पाउनु जनताको मौलिक अधिकार रहेको बताए । उनले आकस्मिक सेवाबाट कुनै पनि नागरिकलाई बन्चित नहने गरी काम गर्न आग्रह गरे ।
उक्त अभिमुखिकरण कार्यक्रममा सहभागी सुदूरपश्चिम प्रदेशका नौ वटै जिल्लाका विभिन्न अस्पताल तथा स्वास्थ्य चौकीबाट २२ जना सहभागी रहेका छन् ।
अभिमुखिकरण कार्यक्रममा महाकाली अस्पतालका मेडिकल सुपरिटेन्डेन्ट अर्जुन भट्टले सहजिकरण गरिरहेका छन् । तीन दिने अभिमुखिकरण कार्यक्रममा स्वागत मन्तव्य स्वास्थ्य कार्यालय डडेल्धुराका प्रमुख केशर साउदले राखेका थिए ।
