बाजुरा । बाजुराको गौमुल गाउँपालिकामा फलाम खानीको सम्भाव्यता अध्ययनले नयाँ आशा जगाएको छ। नेपाल सरकारको खानी तथा भूगर्भ विभागका जियोलोजिष्ट टोलीले गाउँपालिकाका विभिन्न स्थानमा प्रारम्भिक अध्ययन सम्पन्न गरेपछि स्थानीयवासीमा उत्साह छाएको छ ।
गाउँपालिकाले पालिकाभित्र फलाम खानी रहेको सम्भाव्य तथ्यसहित उद्योग, वाणिज्य तथा आपूर्ति मन्त्रालयमा पत्राचार गरेपछि अध्ययन प्रक्रिया अघि बढाइएको हो। जियोलोजिष्ट नविन विक र राजेश शर्माको नेतृत्वमा खटिएको टोलीले सयौं वर्ष पहिले फलाम उत्खनन् गरिएका गुफाहरूको निरीक्षण गर्दै प्रारम्भिक तथ्य संकलन गरेको छ।
गाउँपालिकाकी उपाध्यक्ष सीता थापाका अनुसार, परम्परागत रूपमा फलाम उत्खनन् गरिएका प्रमाणहरू भेटिएका छन्। "पुरानो समयमा प्रयोग गरिएका फलामका अवशेष र उत्खनन् स्थलहरू भेटिएको आधारमा विस्तृत अध्ययन अघि बढाउने योजना छ," उनले भनिन् ।
टोलीले प्रमुख सम्भावित क्षेत्रहरू माडि खोलाको बाम्णा धाउ गुफा, अम्लिसको नुवामाटा, भूटिपरी, रनेडा, आला, निलासैन लगायतका स्थानमा अध्ययन गरेको छ। पहिलो चरणमा संकलित स्याम्पल परीक्षणका लागि काठमाडौं पठाइएको छ, जसको नतिजाले फलामको वास्तविक अस्तित्व पुष्टि गर्नेछ ।
स्थानीयवासीहरू फलाम खानीको सम्भाव्यता अध्ययनपछि उत्साहित देखिएका छन् । यदि फलाम खानीको पुष्टि भएमा यसले गाउँपालिकामा आर्थिक विकासको नयाँ ढोका खोल्ने विश्वास गरिएको छ । सरकारी पहल र स्थानीय चासोले बाजुराको गौमुल सम्भावित खानी क्षेत्रको रूपमा स्थापित हुने अपेक्षा गरिएको छ ।
