डडेल्धुरा ।  सशस्त्र प्रहरी बल नं. ५२ गुल्म हेडक्वाटर, डडेल्धुराले बिहीबार आफ्नो १८औं स्थापना दिवस भव्य रूपमा सम्पन्न गरेको छ। अमरगढी नगरपालिका-७, रातागाउँ रत्नपुरमा अवस्थित हेडक्वाटरले आफ्नो वार्षिकोत्सव विभिन्न गतिविधि, उत्कृष्ट  सशस्त्र प्रहरी जवान सम्मान तथा सांस्कृतिक कार्यक्रमका साथ मनाएको हो ।

स्थापना दिवस समारोहमा सुदूरपश्चिम प्रदेश नं. ७ वैद्यनाथ बाहिनी मुख्यालय, अत्तरियाका  सशस्त्र प्रहरी महानिरीक्षक (आईजी) दीपक अधिकारी प्रमुख अतिथिका रूपमा उपस्थित थिए। कार्यक्रममा शसस्त्र प्रहरीले गरिरहेका कार्य, कर्तव्य तथा गतिविधिहरूबारे जानकारी गराइएको थियो ।

समारोहमा जिल्लाका विभिन्न राजनीतिक दलका प्रमुख, जनप्रतिनिधिहरू, प्रमुख जिल्ला अधिकारी, अर्जुनवाण गणका गणपति, नागरिक समाजका अगुवा, समाजसेवी तथा पत्रकारहरूको उपस्थिति थियो ।  सशस्त्र प्रहरी बल नं. ५२ गुल्म हेडक्वाटरका  सशस्त्र प्रहरी नायव उपरीक्षक (डीएसपी) साजेन्द्र श्रेष्ठले यसबारे जानकारी दिएका थिए ।

स्थापना दिवसको अवसरमा प्रमुख अतिथि दीपक अधिकारी, विशिष्ट अतिथि नेकपा माओवादी केन्द्र डडेल्धुराका संयोजक एवं अजयमेरु गाउँपालिकाका अध्यक्ष उमेश भट्ट, प्रमुख जिल्ला अधिकारी चोमेन्द्र न्यौपाने लगायतका विशिष्ट व्यक्तिहरूले केक काटेर कार्यक्रमको औपचारिक सुरुवात गरेका थिए ।

कार्यक्रममा प्रमुख अतिथि अधिकारीले  सशस्त्र प्रहरी बलले सीमा सुरक्षाको महत्वपूर्ण जिम्मेवारी वहन गर्दै आएको तथा विपद् व्यवस्थापनका क्षेत्रमा पनि उल्लेखनीय कार्य गरिरहेको बताए। उनले भने, "स्थापना दिवस मनाउने परम्पराले  सशस्त्र प्रहरीले गरिरहेका विविध गतिविधिहरूबारे आम जनतामा जानकारी पुर्‍याउन महत्वपूर्ण भूमिका खेलेको छ।"

सीमा सुरक्षा र बिओपी विस्तार

डीएसपी साजेन्द्र श्रेष्ठका अनुसार हाल डडेल्धुरामा एक गुल्म हेडक्वाटरसँगै ६ वटा बोर्डर आउट पोस्ट (बीओपी) संचालनमा छन् । नेपाल सरकार गृह मन्त्रालयको निर्णयअनुसार डडेल्धुरामा थप चार बीओपी स्थापना गरिनेछ, जसले कुल बीओपीको संख्या १० पुग्नेछ। उनले थप चार बीओपीका लागि स्थान छनोट प्रक्रिया अघि बढाइएको जानकारी दिए ।

भारतसँग जोडिएको डडेल्धुराको १४५ किमी सीमा क्षेत्रफलमा  सशस्त्र प्रहरी बल परिचालित रहेको छ। यस क्षेत्रका सीमावर्ती इलाकामा सुरक्षासँगै आपराधिक क्रियाकलाप नियन्त्रण, अवैध तस्करी तथा चोरी-निकासी रोकथामका लागि  सशस्त्र प्रहरी बल निरन्तर क्रियाशील रहेको डीएसपी श्रेष्ठले बताए।