डडेल्धुरा- डडेल्धुरामा द्वारिकादेवी ठकुरानी सुदूरपश्चिम प्रदेश अन्तर पालिकास्तरीय महिला भलिबल प्रतियोगिता सुरु भएको छ ।
जिल्ला भलिबल संघ डडेल्धुराको आयोजनामा शुक्रबारदेखि उक्त प्रतियोगिता सुरु भएको हो ।
प्रतियोगिताको कार्यक्रमकी प्रमुख अतिथि सुदूरपश्चिम सरकारका सामाजिक विकास राज्यमन्त्री सरस्वती खड्काले उद्घाटन गरिन् ।
राज्यमन्त्री खड्काले महिलाहरूको खेलप्रति रूचि रहेको तर तीन तहका सरकारले खेल क्षेत्रमा बजेट विनियोजन न्यून गरिरहेको बताइन् ।
उनले आगामी आर्थिक वर्षमा जिल्लामा एउटा खेलकुद मैदानका लागि बजेट विनियोजन गर्ने आश्वासन दिइन् ।
ग्रामीण क्षेत्रमा रहेका महिला खेलाडीलाई राष्ट्रियस्तरमा प्रतिस्पर्धा गराउन सक्ने बनाउनका लागि प्रतियोगिताको आयोजना गरिएको संघका अध्यक्ष राजेन्द्रबहादुर ठगुन्नाले बताए ।
उनका अनुसार प्रतियोगितामा डडेल्धुराका तीन, बैतडी, दार्चला र कैलालीका एक/एक गरी ६ टिमको सहभागिता रहेको छ ।
शुक्रबार भएको पहिलो खेलमा परशुराम नगरपालिकाले नवदुर्गा गाउँपालिकालाई ३–१ को सेटमा हराएको भने दोस्रो खेलमा अमरगढी नगरपालिकाले पाटन नगरपालिकालाई ३–२ को सेटमा पराजित गरेको छ।
प्रतियोगितामा प्रथम हुने टिमले नगद १ लाख १११ रुपैयाँका साथै ट्रफी, मेडल र प्रमाणपत्र पाउने आयोजकले जनाएको छ ।
यस्तै द्वितीयले ५१ हजार १११ रुपैयाँ र तृतीयले २५ हजार १११ रुपैयाँका साथै ट्रफी, मेडल र प्रमाणपत्र पाउनेछ ।
अमरगढी नगरपालिका–४ टुँडिखेलमा भइरहेको प्रतियोगिता चैत १७ गतेसम्म सञ्चालन हुनेछ ।
