डडेल्धुरा । डडेल्धुराको जिल्ला सदरमुकाममा निजामती कर्मचारीहरूका लागि ब्याडमिन्टन प्रतियोगिता सुरू भएको छ । सुदूरपश्चिम प्रदेश सामाजिक विकास मन्त्रालयअन्तर्गत सामाजिक विकास कार्यालय, डडेल्धुराको आयोजनामा जिल्ला प्रहरी कार्यालयको डडेल्धुरास्थित ब्याडमिन्टन कोर्टमा प्रतियोगिता आयोजना गरिएको सामाजिक विकास कार्यालय, डडेल्धुराका कार्यालय प्रमुख राधाकृष्ण जोशीले जानकारी दिए ।
उनका अनुसार डडेल्धुरा जिल्ला सदरमुकाममा कार्यरत निजामती कर्मचारीहरूका लागि यो प्रतियोगिता आयोजना गरिएको हो । प्रतियोगितामा विभिन्न सरकारी कार्यालयहरू तथा स्थानीय तह गरी १६ वटा टिमको सहभागिता रहेको छ ।
शुक्रवार प्रतियोगिताको उद्घाटन गर्दै सामाजिक विकास राज्यमन्त्री सरस्वती खड्काले जिल्लामा इनडोर खेल सञ्चालनका लागि आवश्यक पूर्वाधारको आवश्यकता रहेको उल्लेख गरिन् । उनले यस वर्ष सामाजिक विकास कार्यालयमार्फत १० लाख रुपैयाँ र शहरी विकास तथा भवन निर्माण कार्यालयमार्फत १० लाख रुपैयाँ विनियोजन भएकाले ब्याडमिन्टन कोर्टको निर्माण सम्पन्न भई खेल खेल्न सहज हुने बताइन् ।
उनले भनिन्, "निजामती कर्मचारीहरू जनताको सेवामा व्यस्त रहँदा तनाव कम गर्न तथा शारीरिक स्वास्थ्य सुधार गर्न यस्ता खेलकुद सम्बन्धी कार्यक्रमहरू आवश्यक छन् । यसले कर्मचारीहरूबीच मित्रता सुदृढ गर्न तथा काम गर्न सहज वातावरण तयार गर्न मद्दत गर्छ ।"
प्रतियोगिता उद्घाटन कार्यक्रममा प्रमुख जिल्ला अधिकारी चोमेन्द न्यौपाने सभाध्यक्ष रहेका थिए भने स्वागत मन्तव्य कर्मचारी मिलन केन्द्रका अध्यक्ष करूणाकर अवस्थीले राखेका थिए ।
