Paschim Express
गहनान धाममा पुगेर देउवाले भने- नेपाल हिन्दु धर्म मान्ने राष्ट्र हो

डडेल्धुरा । नेपाली काँग्रेसका सभापति शेरबहादुर देउवाले नेपाल हिन्दु धर्म मान्ने राष्ट्र भएको बताएका छन् ।

डडेल्धुरा–डोटी जिल्लाको संगमस्थल सेती नदीको गहनान धाममा आइतबार महायज्ञको उद्घाटन गर्दै देउवाले यस्तो बताएका हुन् । `हिन्दु परम्परालाई मान्ने नेपालीको परम्परा हो,´ उनले भने, `गाईलाई पूजा गर्ने देश हो । गौहत्या गर्न पाइदैन ।´

गहनानमा धार्मीक पर्यटन प्रवद्र्धन र गहनान क्षेत्रको विकास गर्ने उद्देश्यसहित महायज्ञको आयोजना गरिएको हो । डडेल्धुरा जिल्लाको नवदुर्गा गाउँपालिका ४, गन्यापधुरा गाउँपालिका ५ र डोटी जिल्लाको शिखर नगरपालिका १० को संगमस्थल गहनान धाममा महायज्ञको आयोजना गरिएको गन्यापधुरा गाउँपालिका अध्यक्ष इन्द्रबहादुर कार्कीले जानकारी दिए ।

तीन वटै पालिकाको समन्वय र सहकार्यमा महायज्ञको आयोजना गरेको उमले बताए । उनका अनुसार गहनान क्षेत्र विकास समितिले २५ गतेसम्म महायज्ञ सञ्चालन हुने छ ।

शिखर नगरपालिकाका नगर प्रमुख दीर्घबहादुर बलायरले गहनानसंगै यस क्षेत्रमा भौतिक पूर्वाधार विकासका काम अघि बढाउन काँग्रेस सभापती देउवालाई ज्ञापन पत्रसमेत बुझाए ।

गहनान् क्षेत्रमा आवश्यक पूर्वाधार, संस्कृत विद्यालय स्थापना, सेती र सकायल नदीको कटान रोक्न तटबन्ध निर्माण, सेती नदीमा पुल, महाभारत पर्वत क्षेत्र भएर गन्यापधुराको रेल–शिखर–केआईसिंह गाउँपालिका जोड्ने सडक निर्माणका लागि मागपत्रसहित ज्ञानपत्र बुझाइएको उनले बताए ।

प्रकाशित मिति: आइतबार, चैत १७, २०८१  २०:४०
प्रतिक्रिया दिनुहोस्
Weather Update