डडेल्धुरा । सुदूरपश्चिम विश्वविद्यालयका आंगिक क्याम्पसहरूमा २७ चैतमा हुने स्वतन्त्र विद्यार्थी युनियन (स्ववियु) निर्वाचनका लागि मनोनयन दर्ता सुरु भएको छ।

केन्द्रीय अनुगमन तथा समन्वय समितिले सार्वजनिक गरेको निर्वाचन तालिका अनुसार सोमबार बिहान ११ बजेदेखि मनोनयन दर्ता प्रक्रिया सुरु भएको हो, जुन दिउँसो २ बजेसम्म जारी रहनेछ।

निर्वाचन कार्यतालिका अनुसार, उम्मेदवारको प्रारम्भिक नामावली बेलुका ५ बजे प्रकाशित गरिनेछ। १९ गते बिहान १० बजेदेखि दिउँसो १ बजेसम्म दाबी–विरोध दर्ता गर्न सकिनेछ भने सोही दिन बेलुका ५ बजे अन्तिम नामावली प्रकाशन हुनेछ। २० गते उम्मेदवारी फिर्ता लिने समय तोकिएको छ, २१ गते अन्तिम नामावली सार्वजनिक हुनेछ, र २७ गते बिहान ८ बजेदेखि दिउँसो ४ बजेसम्म मतदान हुनेछ ।

कुल १६ आंगिक क्याम्पसहरूमा निर्वाचन हुने तय भएको छ । तीमध्ये कैलाली, डडेल्धुरा, बैतडी, अछाम, डोटी, दार्चुला, बाजुरा र बझाङका बहुमुखी क्याम्पसहरू समेटिएका छन् ।

तर, सुदूरपश्चिम विश्वविद्यालयको केन्द्रीय क्याम्पसमा भने निर्वाचन प्रक्रिया अवरुद्ध भएको छ । एकीकृत समाजवादीनिकट अनेरास्ववियू र नेकपानिकट अखिल समाजवादीले संयुक्त रूपमा निर्वाचन संयोजकको कार्यालयमा तालाबन्दी गरेका छन्।  उनीहरूले वास्तविक विद्यार्थीलाई मतदानबाट वञ्चित गराउन खोजिएको आरोप लगाउँदै तालाबन्दी गरेको जनाएका छन् ।

 त्रिवेणी बहुमुखी क्याम्पसमा २ संगठन बीच प्रतिस्पर्धा

डडेल्धुराकाे परशुराम-१२ स्थित त्रिवेणी बहुमुखी क्याम्पसको स्ववियु निर्वाचनमा २ संगठन बीच चुनावी प्रतिस्पर्धा हुने भएको छ ।

स्ववियु निर्वाचनका लागि ५ संगठनले संगठन दर्ता गरे पनि मुख्यत: दुई संगठन बीच प्रतिस्पर्धा हुने अनुमान गरिएको छ।

स्ववियु निर्वाचन तालिका अनुसार नेपाल विद्यार्थी संघ, अनेरास्ववियू र अखिल क्रान्तिकारीको संयुक्त प्यानल बीच प्रतिस्पर्धा देखिएको छ । उम्मेदवारी दर्ताको प्रक्रिया पनि सोहीअनुसार सम्पन्न भएको छ ।

एमाले निकट अनेरास्ववियू र माओवादी निकट अखिल क्रान्तिकारी बीच हिजो मध्यरातको गठबन्धन पश्चात् द्विपक्षीय भिडन्त हुने सम्भावना रहेको छ ।

दुवै संगठनले माओवादी केन्द्र निकट अनेरास्ववियू (क्रान्तिकारी) का भोज लुहारलाई अध्यक्षका लागि उम्मेदवार बनाएर प्रतिस्पर्धामा उत्रिएका छन् ।

त्यस्तै, नेपाली कांग्रेस निकट नेपाल विद्यार्थी संघले इकाई कमिटी सभापति प्रकाश अवस्थीको नेतृत्वमा प्रत्यक्ष र समानुपातिक उम्मेदवारको उम्मेदवारी दर्ता गरेका छन् ।