बैतडी । सुदूरपश्चिमकी सामाजिक विकास राज्यमन्त्री सरस्वती खड्काले जिल्ला अस्पताल बैतडी र जिल्ला स्वास्थ्य कार्यालयको अनुगमन गरेकी छिन् । अनुगमनपछि जिल्ला अस्पताल बैतडीमा केवल १५ शय्या मात्रै रहेको पाइएकाले यसको स्तरोन्नतिका लागि आवश्यक पहल गरिने उनले बताइन् ।
अनुगमनका क्रममा अस्पतालका अध्यक्ष पार्वती भट्टले अस्पतालमा जनशक्ति अभाव रहेको र सेवा प्रवाह दिन कठिनाइ भइरहेको जानकारी गराइन् । उनले दिनानुदिन अस्पतालको सेवा खस्कँदै गएको भन्दै आवश्यक जनशक्ति तथा स्रोतसाधनको व्यवस्था गरिदिन आग्रह गरिन् ।
त्यस्तै, जिल्ला स्वास्थ्य कार्यालय बैतडीका प्रमुख तिर्थ बहादुर भट्टले कार्यालयको आफ्नै भवन तथा स्टोर नभएकाले व्यवस्थापनमा कठिनाइ भइरहेको बताए । उनले स्वास्थ्य सेवाको प्रभावकारी सञ्चालनका लागि भवन निर्माण तथा अन्य भौतिक पूर्वाधारको व्यवस्था गर्न सरकारसँग आग्रह गरे ।
मन्त्री खड्कालेले अनुगमनपछि जिल्लाका स्वास्थ्य संस्थाहरूको स्तरोन्नति तथा सुधारका लागि आवश्यक पहल गरिने प्रतिबद्धता व्यक्त गरेकी छिन् ।
