दार्चुला । सुदूरपश्चिम प्रदेश सरकार अन्तर्गत सामाजिक विकास मन्त्रालयद्वारा सञ्चालित सुरक्षित आप्रवासन (सामी) कार्यक्रमको सेवा प्रवाह सम्बन्धी छलफल तथा अभिमुखिकरण कार्यक्रम दार्चुलाको खलंगामा सम्पन्न भएको छ।
स्वीस सरकारको तर्फबाट हेल्भेटास नेपालको प्राविधिक सहयोग तथा संघीय सरकार, प्रदेश सरकारको सहकार्यमा सञ्चालित सामि कार्यक्रमको उद्देश्य सुरक्षित वैदेशिक रोजगारी सुनिश्चित गर्नु रहेको सामाजिक विकास मन्त्रालयकी चम्पा जोशीले जानकारी दिइन् ।
सामाजिक विकास राज्यमन्त्री सरस्वती खड्काले वैदेशिक रोजगारीमा जाने युवाहरू पर्याप्त तालिम नलिई जानुका कारण धेरै समस्या भोग्नुपर्ने अवस्थाको सृजना हुने भएकाले यस्ता कार्यक्रमहरू उपयोगी हुने बताइन् । साथै, उनले स्थानीय तहहरूले पनि जिम्मेवारी लिनुपर्ने भन्दै तालिम तथा सचेतनामूलक कार्यक्रमहरू संचालन गर्नुपर्ने धारणा राखिन् ।
प्रमुख जिल्ला अधिकारी यज्ञराज जोशीले वैदेशिक रोजगारीका समस्या, समुदायमा पर्ने असर तथा श्रमिकका अधिकार सम्बन्धी कार्यपत्र प्रस्तुत गरेका थिए । कार्यक्रममा सामि कार्यक्रमका प्रदेश कार्यक्रम व्यवस्थापक पञ्चराम चौधरीले सुरक्षित आप्रवासन कार्यक्रम अन्तर्गत सूचना तथा परामर्श सेवा, कानुनी सहजिकरण, सीप विकासका लागि सहयोग तथा क्षतिपूर्ति व्यवस्थाका बारेमा जानकारी गराए ।
उक्त कार्यक्रममा जिल्लाका ९ वटै स्थानीय तहका प्रमुख, उपप्रमुख, अध्यक्ष, उपाध्यक्ष तथा विभिन्न सरोकारवालाहरूको उपस्थिति रहेको थियो । जिल्ला समन्वय समिति संयोजक महादेव बडु कस्यपको अध्यक्षतामा कार्यक्रम सम्पन्न भएको थियो भने सामाजिक विकास मन्त्रालयका कार्यक्रम अधिकृत रामचन्द्र जोशीले कार्यक्रम सञ्चालन गरेका थिए ।
