डडेल्धुरा । डडेल्धुरा मेडिकल कलेजले अध्यापन अनुमित पाएसंगै विद्यार्थी भर्ना प्रक्रिया अगाडि बढाएको छ ।  चिकित्सा शिक्षा आयोगले छात्रवृत्तिमा अध्ययन गर्ने विद्यार्थीको नामावली प्रकाशन गरेपछि सुदूरपश्चिम विश्वविद्यालय, स्वास्थ्य विज्ञान संकाय अर्थात् डडेल्धुरा मेडिकल कलेजले विद्यार्थी भर्नाको प्रक्रिया अगाडि बढाएको हो ।

आयोगले डडेल्धुरा मेडिकल कलेजका लागि १० जनाको कोटा निर्धारण गरेकोमा ७ जना छात्रवृत्तिमा अध्ययनका लागि छनोट गरेको छ । उनीहरुको नाम नै सार्वजनिक गरेर सुदूरपश्चिम विश्वविद्यालयमा भर्ना हुन आग्रह पनि गरिएको छ ।

सुदूरपश्चिम विश्वविद्यालय, स्वास्थ्य विज्ञान संकायका डिन हेमनाथ जोशीका अनुसार बाँकी तीन जना भने शुल्क तिरेर अध्ययन गर्न पाउने भएका छन् । सरकारले डडेल्धुरा अस्पताललाई मेडिकल कलेज घोषणा गरेपछि सञ्चालनको प्रक्रिया अगाडि बढाएकोमा चिकित्सा शिक्षा आयोगले असोज दोस्रो साता कक्षा सञ्चालनका लागि अनुमति दिएको थियो ।  

डडेल्धुरा अस्पतालका अध्यक्ष करुणाकरण ओझाका अनुसार ब्याचलर इन मेडिकल ल्याब टेक्नोलोजीको कक्षा सञ्चालनको अनुमति पाइएको हो ।मेडिकल कलेज सञ्चालनका लागि सुदूरपश्चिम विश्वविद्यालयको नाममा डडेल्धुराको तुफानडाँडास्थित ८४ रोपनी जग्गा प्राप्त भइसकेको छ । त्यसैगरी, डडेल्धुरा अस्पतालको नाममा दुई सय ३४ रोपनी जग्गा छ । सुदूरपश्चिम विश्वविद्यालयले डडेल्धुरामा डिनको कार्यालय स्थापना गरिसकेको छ । भौतिक संरचना निर्माणका लागि डिपिआरको काम पनि भइरहेको सुदूरपश्चिम विश्वविद्यालयले जनाएको छ ।