बैतडी । प्रधानमन्त्री कप पुरूष एकदिवसीय राष्ट्रिय क्रिकेट प्रतियोगिताका लागि सुदूरपश्चिम प्रदेशस्तरीय छनाैट आजदेखि बैतडीमा शुरू भएकाे छ । बैतडीको दशरथचन्द क्रिकेट मैदान सुन्दरखालीमा सम्पन्न उद्घाटन खेलमा डडेल्धुरा विजयी भएकाे छ ।
डडेल्धुराले सुखद शुरूवात गर्ने क्रममा दार्चुलामाथि २ विकेटको संघर्षपूर्ण जित निकाल्याे । जितका लागि पाएकाे ७९ रनकाे सामान्य लक्ष्य डडेलधुराले १८.२ ओभरमा ८ विकेटको क्षतिमा भेट्टायाे । जसमा विशाल ऐरले सर्वाधिक २३ रनकाे याेगदान गरे । दार्चुलाका विरेन बम र दिनेश कार्कीले ३/३ विकेट हात पारे ।
यसअघि पहिला ब्याटिङ गरेकाे दार्चुला २१.५ ओभरमा ७८ रनमा समेटियो । उसका दिनेश कार्कीले २४ रनकाे याेगदान गरे । डडेल्धुराका निरज ऐरले ४ विकेट हात पारे। निरज खेलका म्यान अफ द म्याच समेत चुनिएका स्काेरर नरेन्द्र चन्दले बताए ।
प्रतियोगिता अन्तरगत भाेलि दार्चुला र डाेटीबीच प्रतिस्पर्धा हुनेछ । उद्घाटन खेलअघि आज प्रतियोगिताकाे एक कार्यक्रम गरेर उद्घाटन गरिएको छ । उद्घाटन समाराेहमा नेपाल क्रिकेट संघ क्यानका अध्यक्ष चतुरबहादुर चन्द, बैतडीका प्रमुख जिल्ला अधिकारी भीमकान्त शर्मा, सुदूरपश्चिम प्रादेशिक क्रिकेट संघका अध्यक्ष बाशुदेव जाेशी लगायतको उपस्थिति रहेकाे थियोे ।
सुदूरपश्चिम प्रादेशिक क्रिकेट संघकाे आयाेजना तथा बैतडी जिल्ला क्रिकेट संघको सहआयाेजनामा प्रतियोगिता सञ्चालन भएकाे हाे ।
प्रादेशिक क्रिकेट संघले यसवर्षदेखि दुई चरणमा प्रदेश छनाैट गरिररहेकाे छ । पहिलाे चरणमा बैतडीमा प्लेट च्याम्पियनसिप र दाेस्राे चरणमा कैलालीमा ईलिट च्याम्पियनसिपका खेलहरू हुनेछन् ।
प्लेट च्याम्पियनसिपमा दार्चुला, बझाङ, डडेल्धुरा, डाेटी तथा ईलिट च्याम्पियनसिपमा बैतडी, कैलाली, कञ्चनपुर र अछाम सहभागी छन् ।
गतवर्षकाे प्रदेश छनाैटमा सेमिफाइनल पुगेका टाेलीले साेझै ईलिट च्याम्पियनसिप र सेमिफाइनलमा नपुगेका टाेलीले प्लेट च्याम्पियनसिप खेल्न लागेका हुन् ।
प्लेट च्याम्पियनसिपकाे विजेता टाेलीले ईलिट च्याम्पियनसिपमा सहभागी हुने सुदूरपश्चिम प्रादेशिक क्रिकेट संघका उपाध्यक्ष रमेश बाेहराले बताए ।
ईलिट च्याम्पियनसिपकाे उद्घाटन खेलमा पुस १४ गते बैतडी र प्लेट च्याम्पियनसिपकाे विजेता टाेलीबीच खेल हुनेछ ।
खेलाडीहरूकाे क्षमता अभिबृद्धिका प्लेट र ईलिट च्याम्पियनसिपकाे आयाेजना गरिएको नेपाल क्रिकेट संघ क्यानका अध्यक्ष चतुरबहादुर चन्दले बताए ।
