डडेल्धुरा । डडेल्धुराको परशुराम नगरपालिका–५ परीगाउँस्थित परशुरामधाममा माघे संक्रान्तिको अवसरमा लाग्ने मकर स्नान मेला भव्य रूपमा सम्पन्न भएको छ । चार धाममध्येको एक धाम परशुराममा आइतबार बेलुकीदेखि सुरु भएको मेला सोमबार सम्पन्न भएको हो ।
परशुरामधाममा गंगा आरती पनि प्रस्तुत गरिएको थियो । परशुराम धाममा रहेका चुनढुंगा भगवान परशुरामले तपस्या गरेपश्चात होम गरेपछि बनेको भन्ने जनविश्वास रहँदै आएको छ । भगवान परशुरामले तपस्या गरेकाले यो स्थानको नाम परशुराम धाम राखिन गएको पुराणमा उल्लेख गरिएको छ ।
पुस मसान्तको साँझ यहाँ आएर रातभर आगो तापेर भक्तजनहरू जाग्रम बस्ने गर्दछन् । त्यसो गर्नाले धर्म कमाइने विश्वास छ । सोमबार बिहान ४ बजेदेखि महाकाली किनारमा नुहाउने भक्तजनहरूको भीड थियो । माघे संक्रान्तिको दिन गंगा स्नान गरेमा सम्पूर्ण पाप कट्टी हुने तथा पुण्य कमाइने विश्वास गरिन्छ ।
